Kadto rang rehistrado sa 

EDCVL ang maka-botar 

Rey Anthony Chiu 

TAGBILARAN CITY, Bohol, April 28, 2013 (PIA) – Kadto lamang mga botante kansang pangalan makit-an sa Election Day Computerized Voters List (EDCVL) ang mahimo nga mobotar. 

Kini segun sa Manual of General Instructions nga gipaambit sa Commission on Elections (COMELEC) ngadto sa mga natudlo isip sakop sa Board of Election Investors (BEI) ug maoy magdumala sa piliay karong Mayo 13. 

Tungod usab niini, tambag ni Oliver Glovasa, kinsa election officer sa us aka lungsod sa Bohol, mas maayo nga una nga matan-aw sa us aka botante kon anaa ba sa Posted Computerized Voters List (PCVL) nga pakapaskil na karon sa mga presinto. 

Sa pagtan-aw sa botante sa ilang pangalan sa PCVL, mas maayo usab nga iya na nga matiman-an ang numero sa iyang presinto, ugang iyang voters sequence number, kay kinahanglan kini sa panahon sa piliay, dugang ni Glovasa. 

Kon wala ang imong pangalan, buot ipasabot ana nga natangtang ka na sa listahan tungod sa pagkapakyas sa pagbotar sa duh aka higayon sa mga nag-unang piliay. 

Matud sa Comelec, ang pagkapakyas sa pagbotar sa duha ka labing bag-o nga piliay mahimong rason sa pagkatangtanag. 

Sa laing bahin, dugang ni Atty Ricardo Villares nga gawas sa pagkapakyas sa pagbotar sa duha ka beses, ang pagbalhin og rehistro sa usa ka botante ngadto sa laing presinto usa sa mga rason nga matangtang na ang iyang pangalan sa daan niya nga presinto. 

Subay usab niini, mahimo ang ordinaryong botante o ang watcher ang makareklamo ngadto sa BEI kon may tawong magpatuo nga siya ang nalista. 

Sa General Instructions, mahimong ireklamo ang mga tawong mobotar apan wala marehistro, migamit sa ngalan sa laing tawo, o kasamtangang dili makabotar tungod sa pagdisqualify dala sa mandu sa balaod. 

Kon ireklamo, mapugos ang BEI sa pagpangayog pruweba sa botante nga siya tinuod nga siya rehistrado sa presinto. 

Ang pagkapakyas usab sa pagpakitag pruweba, mahimong basehanan sa BEI nga makapasaka og sumbong sa botante subay sa Fail Elections Act. (30/GG)

===========

Mga mamugsayay mipakita sa 

Porma nga makapa-champion 

Rey Anthony Chiu 

DAUIS, Bohol, April 28, 2013 (PIA) – Gipakita sa mga mamugsayay sa mga nag-unang dragonboat teams sa Pilipinas unsay nakapahimo nilang champions. 

Gagmay nga mga tawo apan paspas ug dungan sa pagbugsay ang team Lake Buhi, samtang malungtaron nga pagbugsay ug siyentipikong postura sa mga mamugsayay ang gituohang nakapa-paspas sa Philippine Army Team. 

Dili usab magpaulahi ang Philippine Navy ug ang bagitong Philippine Coast Guard, kinsa misalign sa ilang teamwork ug lahutay sa bugsay, samtang himoon na sa Lunes ang Finals sa Bohol DagonBoat International Crew Club Challenge didto sa Dauis Promenade. 

Gani, segun pa sa usa sa mga judges sa lumba sa bugsay, katingad-an tungod kay sa ka-bag-o usab sa mga taga Bohol, kinsa nagdala sa ngalan nga Bohol Paddlers Association, makig-lumba na kini uban sa mga bantugang teams sa finals. 

Sa laing bahin, bisan s aka-bag-o pa lamang sa Team Baji sa Bohol, nakab-ot na usab niini ang ubos pa sa us aka minute nga oras sa 200 metros nga lumba. 

Ang lumba sa Dragon-boat sa Bohol maoy gi-tuohan nga lumba nga magtakos kon kinsa gayud ang mas hawod nga dragonboat team. 

Kahinumduman nga ang Dragonboat sa Pilipinas gihari-an sa team sa Philippine Army, hangtud sa imaging lumba sa Manila Bay, kanus-a giilog sa Lake Buhi ang korona sa Army. 

Ang dragonboat sa Pilipinas gi-gawngan sa mga teams sa Army ug Navy samtang mga mag-o nga magsasalmot ang Coast Guard, Lake Buhi ug ubang mga teams nga buot usab maapil sa mga gikaintapang mamugsayay. 

Sa Lunes, ang lumba sa finals makit-an gihapon didto sa luyo sa simbahan sa Dauis, ug mahimong makasaksi ang mga Bol-anon sa mga mananaug sa 200, 500, ug 2000 meters nga lumba sa bugsay. 

Kini tungod kay gidamgo sa Bohol nga mamahimong sikat ang dragonboat dinhi aron mamahimo ang Bohol nga Dagonboat Capital sa nasud. 

Ang mga awas nga grasya sa Dragonboat, gituohan nga mag-tampo sa turismo sa Bohol nga maghatag usab og dugang trabaho ug kita sa mga Bol-anon. (30/hd)