Mga kawani sa gobyerno, gipahinumdoman sa pagsumitir sa ilang SALN 

TAGBILARAN CITY, Bohol, April 29 (PIA)--Gipahinumdoman karon sa Office of the Ombudsman ang mga kawani sa gobyerno nga hangtud na lang ugma, Abril 30 ang deadline sa pagsumitir sa ilang Statement of Assets, Liabilities and Networth (SALN). 

Matud pa ni Ombudsman Conchita Carpio-Morales, base sa nakalatid sa Republic Act No. 6713 o Code of Conduct and Ethical Standards for Public Officials and Employees, obligadong mosumitir sa ilang SALN ang mga nagtrabaho sa gobyerno aron madeklarar nila ang ilang mga gipanag-iyang kabtangan. 

Kauban usab nga ipadeklarar ang net worth sa asawa sa usa ka opisyal o kawani sa gobyerno apil na ang mga anak nila nga may edad 18 paubos ug wala pay asawa. 

Apan gawas sa pagsumiter og SALN, nipasidaan usab si Morales nga magmatinud-anon sa paglista sa mga kabtangan ug mga utang. 

Sigun pa kang Carpio-Morales, ang bisan kinsang kawani sa gobyerno ug mga opisyal nga mapakyas sa pagsumitir o mangilad sa ilang SALN, may silot nga gikan usa hangtud unom ka buwang suspensyon ug pagkatangtang sa serbisyo. 

Una nang gipagawas ang Civil Service Commission og bag-ong SALN form nga maoy gamiton sugod karong tuig. Mahimo kining ma-down load sa ilang website nga www.csc.gov.ph. (PIA-Bohol/ecb/i-gg) 

============

PNP, nipasidaan sa pagdagsang sa mga pekeng kwarta 

TAGBILARAN CITY, Bohol, April 29 (PIA)--Nipasidaan karon ang nasudnong kapolisan sa publiko kalabot sa pagdagsang sa mga pekeng kwarta nga posibleng magamit sa "vote-buying" sa mga kandidato. 

Matud pa sa tigpamaba sa Philippine National Police (PNP) nga si C/Supt. Generoso Cerbo, partikular nga gitutokan sa kapolisan karon ang mga lagyong lalawigan. 

Kini human makadawat og impormasyon ang PNP nga pipila ka mga kandidato sa mga probinsya ang namalit og boto gamit ang mga pekeng kwarta. 

Giseguro sa PNP nga dakpon ug pasakaan og tukmang kaso ang bisan kinsang nagpakuyanap sa mga pekeng kwarta. 

Una nang gikumpirmar ni Comelec Chairman Sixto Brillantes nga ang vote buying ang usa sa tigdala og sakit sa ulo sa komisyon matag eleksyon. 

Giingong nahimo nang normal ang pagdagsang sa mga pekeng kwarta matag panahon sa eleksyon. (PIA-Bohol/ecb/i-gg) 

============

Labing unang ‘Saulog Tagbilaran’ ilusad karong adlawa 

TAGBILARAN CITY, Bohol, April 29 (PIA)--Isip pagtamod sa kapistahan ni Senyor San Jose karong, Mayo 1, ilusad ugmang adlawa ang labing-unang ‘Saulog Tagbilaran’. 

Ang “Saulog Tagbilaran,” usa ka religion-based cultural nga kalihokan nga magpakita sa kinabuhi ni Senyor San Jose, ang patron sa syudad sa Tagbilaran isip mahigugmaong amahan ug debotong mamumuo agig pagpakita sa mga deboto sa ilang pangayupo ug pasalamat ngadto sa patron. 

Ang mga mosalmot sa maong street dancing competition mag-abot sa alas 12 sa udto didto sa daan nga City Hall ug paingon kini sa bag-ong City Hall. 

Siyam ka barangay sa syudad ang mosalmot sa maong street dancing nga naglangkob sa Bool, Booy, Cabawan, Cogon, Manga, Mansasa, Poblacion I, Poblacion 2 ug Ubujan. 

Ang street dancing magsugod sa ala una sa hapon didto sa daang City Hall nga moliko sa wala nga bahin sa C. Gallares Street, moliko sa B. Inting Street ug moderetso paingon sa CPG Avenue atbang sa City Square. Moliko na usab kini sa J.S. Torralba duol sa Plaza Rizal, moliko sa E. Sarmiento nga mag-atubang sa Cathedral ug moliko pa-wala sa J. A. Clarin Street paingon na sa Tagbilaran City Hall Compound. 

Kini nahimo tungod sa pagtambayayong sa City Government of Tagbilaran ug sa Cathedral Parish of Saint Joseph the Worker nga may tema karong tuig nga “Pit Senor San Jose! Viva San Jose! Viva Tagbilaran!”. 

Mosunod usab ang laing programa sa City Hall compound human sa street dancing. 

Sa Mayo 1 ang selebrasyon sa kapistahan sa patron sa syudad ug mao usab kini ang magbukas sa usa ka buwan nga kapistahan sa lain-laing dapit dinhi sa lalawigan sa Bohol. (PIA-Bohol/ecb)