Dugang bansay sa mga lumilihok 

Sa turismo, natumbok sa w-shop 

Rey Anthony Chiu 

TAGBILARAN CITY, Bohol, May 16, 2013 (PIA) –Aron pag-hatag sa katakus sa mga trabahante alang sa mga gimbuhaton sa serbisyo sa turismo, gihimo sa Bohol Association of Hotels, Restaurants and Resorts (BAHRR) ang usa ka Planning Workshop alang sa Pag-ugmad sa mga tigtrabaho, ilabi na sa turismo. 

Ang bansay nga gihimo niadtong Mayo 10, 2013, aron matumbok ang mas gikinahanglang mga bansay sa katakus sa mga trabahante ilabi na sa sakop niining mga establisemento sa Bohol. 

Ang bansay gisuportahan sa PADAYON Bohol Marine Triangle Management (BMT) Council ug LGSP-LED uban sa Provincial Economic Transformation Team (PETT), diin nahisakop ang mga ahensya lakip na ang DTI. 

“Kini naglangkub sa pag-ugmad sa kahibaw sa local nga human resource, sa katakus alang sa pagpanarbaho ug sa pagsugod og kinaugalingong panginabuhian,” butyag ni Ma. Elena Arbon sa DTI. 

Tumong usab niini ang pag-ugmad ug pagpatuman sa mga nag-una nga programa nga magpa-tugma sa mga trabahong gikinahanglan sa mga nag-unang resorts ug restaurants sa Panglao, Dauis ug Baclayon ang magamit nga mga trabahante, dugang niya. 

Gikan dinhi, mahimo usab nga ang mga nabansay manarbaho sa mga silingang lugar nga naghimog mga kalihukan pagsuporta sa turismo, sumpay ni Arbon. 

Tumong sa DTI ang pagpahiluna sa mga nagkadaiyang pagpataas sa kalidad sa serbisyo ug trabahante sa tourism value chain, ug niini nakig-tambayayong sila sa LGSP ug BAHRR. 

Ilawom ning programa, ang BAHRR maoy mag-una sa mga pag bansay, sa rason nga sila ang dunay igong katakus sa pag-pakat-on sa mga trabahante sa ilang mga trabaho. 

Pinaagi sa workshop, nakahimo na ang kahugpungan sa mga naga-una nga listahan sa mga sector sa turismo nga nanginahanglan og bansay. 

Natumbok ang mga bansay sa Food Safety, Waiter Services, Commercial Cooking ug Culinary Arts, Management ug Supervisory Skills, Housekeeping ug Front Office Services, Massage Therapy, Customer Services, Environmental Management Services, Flower Arrangement, Bartending, Inventory Management ug Marketing.

===========

Pag-abot sa CF cards gikaguol, 

Gikalipay sa apikeng kandidato 

Rey Anthony Chiu 

TAGBILARAN CITY, Bohol, May 16, 2013 (PIA) –Samtang ang ubang mga kandidatong na proklamar na, kampante nga nagsaulog sa ilang kadaugan, lahi ang gibati sa pipila nga na-ugtas og huwat sa puli nga compact flash cards aron ma-ihap na ang mga balota’ng nahibilin sa ilang lungsod. 

Sa mga nangapike nga masulod, nindot ang pagbati. Apan sa mga nangapike ug nagbitay sa ika siyam nga pwesto, ang CF cards nag-tanyag ug paglaum. 

Gawas sa mga kandidato sa Alicia, nahimong gabii nga walay tarong kinatulgan ang mga nagkonsehal nga nahibilin sa ikapito ug ikawalo hangtud sa ika napulo ka lugar. 

Kini tungod ka yang mga presinto nga wala pa ma ihap, may gidaghanon sa botante nga igo nga makasapal sa labaw og makapa-us-os sa kinsa man ang nakasaka na unta sa magic 8 sa konseho, o nahauna na unta sa ihap. 

Sa Cortes pananglit diin ang pwesto sa pagkamayor nagligas lang of kubos sa usa ka gatus ka boto, dako na og mahimo ang 978 ka boto sa Loreto nga kasamtangang giihap pa. 

Sa Tagbilaran City, diin ang labaw sa pagkabise mayor, wala ray gatus, ang 974 ka boto nga wa pa ma-ihap dako pa usab og ikahimo aron usbon ang mga posisyon sa bise mayor ug sa mga konsehal nga nakasulod na sa Magic 10. 

Subay sa balaod, 10 ang pillion sa pagka konsehal sa mga component og charter cities sama sa Tagbilaran. 

Padayon pa ang pag-ihap sa mga balota sa Guadalupe ug La Salvacion sa Carmen, diin mokapin pa sa usa ka libo ang madugang sa mga boto sa mga kandidato didto. 

Duolan pa usab sa usa ka libo ang makuha nga boto sa Ubojan, Calape, kapin sa 500 sa Bayawahan Sevilla, 721 sa Boctol Balilihan, ug dul-an sa libo ang sa Guiwanon Baclayon. 

Sa Alicia, bisan pa unsay mahitabo, sulod na ang walo ka kandidato kay sa 765 ka boto nga giihap, wala nay laing kadulngan kini kay wala na lang usab ang ilang kandidato, segun sa unang taho. 

Wala nakahimo og pagparan sa mga kandidato sa Alicia, nga giingong labing sayon nga kadaugan sa Bohol ning 2013. 

Kapin sa 7000 pa ka boto ang ikadugang sa ulahing pag-abot sa mga puli nga CF cards sa Bohol.