Thursday, May 16, 2013

K-12 Act, gilagdaan na ni PNoy 

TAGBILARAN CITY, Bohol, May 15 (PIA)--Gilagdaan na ni Presidente Benigno Aquino III ganinang buntag, Miyerkules ang balaod nga magdugang og duha pa ka tuig sa basic education sa Pilipinas. 

Ubos sa Republic Act 10533, ipatuman na ang "K to 12 program" sa gobyerno, nga gisugdan na sa Department of Education (DepEd) sa mga tunghaan sa tibuok nasud sa niaging tuig. 

Sa bag-ong balaod, mabag-o na ang basic education program sa nasud – usa ka tuig sa Kindergarten, unom ka tuig sa primary school, upat ka tuig sa junior high school ug duha ka tuig sa senior high school. 

Apil usab niini ang pagpatuman sa mother-tongue-based multilingual education program o ang paggamit sa naandang pinulongan sa pagtudlo sa mga estudyante gikan Kinder hangtud Grade 3. 

Matud pa ni Presidente Aquino, mas mapalalom sa K-12 ang kinaadman sa mga estudyante aron makig-dungan sa graduate sa ubang nasud. 

Dugang pa sa Presidente nga dili na mabiyaan ang mga Pilipinong estudyante tungod kay pagatotokan niini ang pagpalambo sa kaalam sa Filipino, Ingles, Math ug Science. 

Dungan niini, gipasigarbo usab sa Presidente nga sa pagsulod sa school year, wala nay backlog sa mga lawak-tunghaan ug giingong mapapas na usab ang kakulang sa mga libro ug lingkoranan sa mga tunghaan. 

"Sa pagsasabatas ng K-12, hindi lang tayo magdaragdag ng dalawang taon para sa pagsasanay ng ating mga mag-aaral, titiyakin natin na talagang nabibigyang-lakas ang susunod na henerasyon na maki-ambag sa pagpapalago ng ating ekonomiya at lipunan." matud pa ni Presidente Aquino. (PIA-Bohol/ecb/i-gg)

============
Taiwan, nipatuman og freeze hiring sa mga trabahanteng Pinoy 

TAGBILARAN CITY, Bohol, May 15 (PIA)--Padayon nang gipatuman sa gobyerno sa Taiwan ang freeze hiring o dili pagkuha og mga trabahanteng Pinoy. 

Atubangan kini sa nahitabong pagpamusil sa mga sakop sa Philippine Coast Guard (PCG) sa mga Taiwanese fishing vessel nga nakapatay og usa ka mangingisdang Taiwanese sa kadagatan nga sakop sa Balintang Channel sa Batanes sa niaging semana. 

Gipahayag ni Taiwan President Ma Ying-jeou nga gimando sa ilang pangulo ang paghunong sa pagkuha og mga trabahanteng Pinoy agig pagpadayag sa hingpit nga pagkadismaya sa giingong 'mishandling' sa gobyerno sa Pilipinas sa kaso sa pagkamatay sa mangingisdang Taiwanese. 

"President Ma expressed his strong dissatisfaction over the Philippines' lack of sincerity and its shifting attitude," matud pa ni Lee Chia-fei. 

Gihimo sa Taipei ang maong desisyon bisan pa sa pagpangayo og pasaylo ni Antonio Basilio, ang de facto Philippine ambassador to Taipei sa pakighinabi niini kang Taiwan foreign minister David Lin kagahapon. 

Gibalik ni Lee ang demand sa Taiwan nga magpagawas ang Pilipinas og formal apology, bayran ang pamilya sa namatay nga mangingisdang Taiwanese, dakpon ang nakapatay nga sakop sa PCG ug sugdan dayon ang pakighinabi sa isyu sa pangisda. 

Kahinomdoman nga nihatag og 72-hr ultimatum ang Taiwanese government niadtong Sabado sa gabii aron mangayo og pasaylo ang Pilipinas ug manubag sa pagkamatay sa usa ka 65-anyos nga mangingisda nga si Hung Shih-cheng. (PIA-Bohol/ecb/i-sjp)

============
Red alert status sa PNP, magpabilin hangtud Hunyo 

TAGBILARAN CITY, Bohol, May 15 (PIA)--Magpabilin sa pinakataas nga status o red alert ang Philippine Natio­nal Police (PNP) sa tibuok nasud hangtud mahuman ang pagdeklarar sa mga modaog nga kandidato. 

Matud pa ni PNP spokesperson Chief Supt. Gene­roso Cerbo Jr., ang national headquarters lamang sa PNP ang magpa-ubos og status human kini gisaka niadtong Mayo 6. “Mananatili po itong full alert status hangga’t hindi nakikitang normal na ang sitwasyon sa buong bansa, maaari rin siguro na tuluy-tuloy na hanggang Independence Day (Hunyo 12),” matud pa sa pahayag ni Cerbo. (PIA-Bohol/ecb/i-sjp)

=============
Paspas nga proseso sa PAccO 
epekto’s bag-ong teknolohiya 
Rey Anthony Chiu 

TAGBILARAN CITY, Bohol, May 15, 2013 (PIA) – Dungan sa katuyoan sa paspas ug mas dayag nga paghimo og transaksyon sa Provincial Accounting Office (PACCO), migamit ang buhatan sa teknolohiya sa computer aron ipasihag ang mga pamaagi ug wagtangon ang haylo sa padangog. 

Kini maoy giluwatan nga pamahayag ni Joseth Celocia, atul sa ilang pagtanyag sa convocation didto sa Acacia Garden sa Kapitolyo di pa dugay. 

Matud ni Celocia, ka yang ilang buhatan natahasan sa paghimog accounting ug Audit sa mga Disbursement Services sa Kagamhanang Provincial, ila na nga responsibilidad nga walay trampas, paspas ug walay estorya nga napalusot kay may napadangog. 

Joseth Celocia, kinsa hepe sa PAccO mitug-an sa mga epleyado nga nagkatapok atul sa monthly convocation nga ang ilang buhatan migamit na sa usa ka software nga gikan sa Commission on Audit. 

Kini nga software magpasayon sa pag-andam ug pagpagawas sa Journal Entry Vouchers (JEV) kay kini subay na man sa mga barometro sa COA, nga mas mopasayon sa pagsubmiter niini nagdto sa COA tungod kay unay na man. 

Ang Electronic-New Government Accounting System (E-NGAS) maoy rason nga mikabat sa 46,076 JEVs o bookkeeping monthly average sa 3,840 ka JEVs sa mga pundo nga gitipigan sa Kapitolyo. 

Gawas sa E-NGAS, ang PAccO migamit na usab sa upgraded Financial Transaction Tracking System (FiTTSys) nga karon naa na sa version 3. 

Gipasabot nita nga ang FiTTSys nga gamit karon, aduna nay index alang sa mga kobrahonon ug sa mga tampohon sa usa ka empleyado, aron diretso na kini ug din a malangan pa. 

Gibutyag usab sa hepe sa PAccO nga uban sa Bohol Information Communication and Technology Unit (BICTU), ang sistema karon mahimo na nga makit-an sa empleyado bisan pag dili na moadto sa PAccO tungod kay nakasumpay kini sa net. 

Dugang pa, napatuman na usab sa buhatan ni Celocia ang improved ug enhanced Remittance Information Tracking System (RITS), nga nagtaban na sa import ug export features. 

Kini nga features maoy mopadali sa pagrecord ug pagsubay sa GSIS, HDMF ug BIR remittances.

=============
Kina-unhan nagda-ug, 
Katapusang iproklamar 
Rey Anthony Chiu 

TAGBILARAN CITY, Bohol, May 15, 2013 (PIA) Ang kina-unhang nagdaug nga lungsod sa Bohol, posibleng lakip sa kinatapusang maproklamar. 

Kini tungod kay lakip ang Alicia sa walo ka mga lungsod nga may mga depektoso nga Compact Flash (CF) Cards sa ilang mga gipanggamit nga Precinct Count Optical Scanners. 

Gawas sa Alicia, may suliran usab sa mga CF Cards nga didto sa usa sa mga presinto sa Baclayon, Balilihan, Calape, Cortes, Carmen, Sevilla, ug Tagbilaran City. 

Ang CF card usa ka mahinundanon nga parte sa PCOS aron mahimo niining mosumada sa mga boto nga naa sa mga balota. 

Matud sa Bohol Comelec, karon moabot pa sa Bohol ang CF Cards gikan sa COMELEC nga isalpak sa PCOS aron mabasa na sa makina ang mga balota. 

Human niini, i-transmit pa usab pinaagi sa digital technology ang datus aron ma-ihap ang boto lakip sa kinatibuk-ang boto sa Bohol. 

Ang Alicia, bugtong lungsod nga ang mga nanagan, walay kontra nga miparang. 

Si Marnilou Ayuban ug Vice Mayor Basilo Balahay lakip na ang walo ka kandidato nga midagan sa pagkakonsehal, wala na usab mahi-atbangi. 

Unang nataho nga siyam ang milansar sa pagka konsehal sa Alicia, kinsa manggi-ilog usab sa 8 ka lingkoranan. 

Opisyal nga nalista sa mga kandidato sa konseho sa lungsod sila (1) Elias Bolanio (Liberal Party), (2) Boy Buyo (Independent), (3) Yolanda Corciega (LP), (4) Frasan Corre (LP), (5) Domingo Curit, (6) Lamberto Deligero (LP), (7) Desideria Gumala (LP), (8) Tars Luzano (Independent) ug (9) Dong Torres (Nationalist People’s Coalition). 

Hinuon, may mga taho nga sa wala pa ang piliay, miatras na ang usa sa mga kandidato sa Alicia, dala sa pagpanagsabot. 

Kini hinuon wala makompirmar ning tigsulat. 

Subay sa huhungihong, nakombinsir sa usa ka lider sa lungsod ang kandidato nga moatras na lang bugti sa tinampohan nga salapi agig bayad sa iya na nga nagasto. 

Sa laing bahin, duha ka mga mayor nga nakompirmar nga milansar nga wala usab ang mi-atbang. 

Si Lila Mayor Regina Salazar ug Sikatuna Mayor Jose Ellorimo dali nga nakompirmar sa mga tinugyanan.

No comments: