Monday, May 06, 2013

Mayo 13, gideklarar nga special non-working holiday 

TAGBILARAN CITY, Bohol, May 06 (PIA)--Gideklarar ni Presidente Benigno “Noynoy” Aquino III isip special non-working holiday ang adlaw sa piniliay sa Mayo 13. 

Ubos sa Proclamation No. 571, s. 2013, gideklarar nga special non-working holiday ang adlaw sa piniliay aron mahatagan og patas nga kahigayonan ang tanang Pilipino nga makabotar. 

"The President has declared Monday, May 13, 2013, a special public (non-working) holiday throughout the country. The Constitution designates national and local polls to be held on the second Monday of May and by virtue of Proclamation No. 571, s. 2013, the President wishes to enable the Filipino people to exercise their right to suffrage," matud pa sa pahayag nga gipagawas sa Malakanyang karong adlawa. 

"We enjoin all eligible to use this non-working holiday to participate in the electoral process that forms the bedrock of our democracy." (PIA-Bohol/ecb/p-gg) 

=============
Anti-Cable Television & Cable Internet Tapping Act of 2013, gilagdaan na ni PNoy 

TAGBILARAN CITY, Bohol, May 06 (PIA)--Gilagdaan na ni Presidente Benigno “Noynoy” Aquino III ang Republic Act No. 10515 o "Anti-Cable Television and Cable Internet Tapping Act of 2013". 

Nahisulod dinhi ang pagbawal ug may kaatbang nga silot ang ilegal nga pagkabit og koneksyon sa mga cable television (CATV) ug cable internet service provider. 

Matud pa ni Presidential Spokesperson Abigail Valte, gilagdaan kini ni PNoy niadtong Abril 17, 2013. 

May silot kini nga pagka-bilanggo og duha hangtud lima ka tuig o silot nga P50,000 hangtud P100,000 o pareho, depende sa kabobot-on sa husgado. 

Kun ang nakalapas usa ka korporasyon o kapunongan, ang presidente, manager, managing partner o bisan kinsang opisyal sa korporasyon kapunongan nga direktang adunay partisipasyon sa maong kalapasan ang manubag. 

Sa paglagda sa Presidente sa maong balaod, ang ilegal nga pagkabit sa bisan unsang signal nga gitanyag sa cable television (CATV) o cable internet system ug ang tuyong pagguba o pagkuha sa CATV o cable internet facilities, gibawal na. 

Gidili usab sa maong balaod ang recording, reproducing, distributing, importing o pagpamaligya og mga intercepted o nadawat nga CATV system/network signals for commercial purposes nga walay pagtugot sa mga CATV o cable internet service provider. 

Epektibo kining maong balaod 15 ka adlaw human sa kopletong pagmantala sa dili mo-ubos sa duha ka pamantalaan nga may kinatibuk-ang pagpakatap sa tibuok nasud. (PIA-Bohol/ecb/p-gg)

============
Tax exemption sa labaw sa minimum wage, tun-an sa gobyerno 

TAGBILARAN CITY, Bohol, May 06 (PIA)--Gitahasan ni Presidente Benigno Aquino III si Bureau of Internal Revenue (BIR) Commissioner Kim Henares nga tun-an kun mahimong e-exempt sa tax ang mga mamumuo nga nagdawat og suholan nga labaw sa minimum wage. 

Kini ang gimando ni Presidente Aquino kang Henares human makig-dayalogo sa mga lider sa labor organizations sa Malakanyang niadtong Martes. 

Matud pa ni Presidential spokesperson Edwin Lacier­da, usa sa nahimong suliran sa labor group nga bisan pasakaan og bisan piso ang ilang minimum wage, dili na sila exemp­ted sa pagbayad og buwis. 

“Ang isang concern po nila tulad nu’ng sa minimum wage. Ang minimum wage kasi tax exempt ‘yon e ‘pag nasa minimum wage. Kapag umakyat ng isang piso ‘yung sweldo n’yo, lumampas ka ng minimum wage, nata-tax siya. Naging concern po ‘yan ng ating labor sector,” pagbutyag ni Lacierda. 

“So kunyari 456 ang sweldo n’yo, minimum wage, ‘pag naging 457, taxable na ‘yan. So ang concern ng mga labor sector, kung tumaas sila ng isang piso, may tama na kami sa tax whereas 456 ‘yan, tax exempt kami,” dugang pa sa tigpamaba sa Presidente. 

Tungod niini, miingon si Lacierda nga gimanduan dayon ni Presidente Aquino si Henares nga sa higayong mahuman na niini ang iyang misyon batok sa mga tax evader, kinahanglang isunod dayon ang pagtuon kun unsaon mahimong exempted sa tax ang mga mamumuo nga nagdawat og labaw sa minimum wage. (PIA-Bohol/ecb) 

=============
PH, nakadawat og ikaduhang investment grade rating 

TAGBILARAN CITY, Bohol, May 06 (PIA)--Nakadawat na usab og investment grade rating ang Pilipinas sa ikaduhang higayon sulod ning tuiga. 

Gikan sa BB+ nga may "positive outlook", gipasaka sa Standard & Poor ang credit rating sa nasud sa BBB. 

Matud pa ni Standard & Poor credit analyst Agost Bernard, ang upgrade nga gihatag sa Pilipinas tungod sa nagkakusog nga external profile sa nasud, wala kaayo paglihok sa presyo sa mga nag-unang panaliton ug nagka-ubos nga pagdepende sa gobyerno sa foreign currency debt. 

Sa opisyal nga pahayag sa S&P, pareho niining gidayeg ang pagpadagan sa gobyerno sa milabay ug kasamtangang administrasyon. 

"The current and previous administrations improved fiscal flexibility through restraining expenditures, reducing the share of foreign currency debt, deepening domestic capital markets, and more recently through modest revenue gains," matud pa sa pahayag. 

Giingon pang gipaabot nga magpadayon ang pagsulod og remittance gikan sa mga trabahanteng Pilipino sa gawas sa nasud ug paglambo sa industriya ug business process outsourcing (BPO). 

Niadtong Marso lamang, nadawat sa Pilipinas ang labing-unang investment grade gikan usab sa Fitch Ratings. (PIA-Bohol/ecb)

No comments: