Mga resorts angay mo-apply 

sa excemption sa liquor ban 

Rey Anthony Chiu 

TAGBILARAN CITY, Bohol, May 6, 2013 (PIA) – Sa nagsingabot nga liquor ban, ang mga resorts ug restaurants nga nag-alagad sa mga langyaw nga turista, mahimo silang mokuha ug excemption alang niini. 

Kini maoy gipasabot ni Atty Jonas Biliran, City Commission on Elections (COMELEC) officer kinsa mitug-an nga gikinahanglan gayud ang pagtugot sa COMELEC kon modisplay, magbaligya ug magtanyag sa ilang mga customers sa ilimnong makahubog. 

Ning piliay sa 2013, lima na ka adlaw, inay duha ka adlaw lamang ang na-andang liquor ban, segun sa Comelec. 

Sugod sa Mayo 9, ipatuman na ang liquor ban, matud sa Comelec ug kini molanat ngadto pa sa Mayo 13. 

Kini nagpasabot nga may rason na ang mga nagpista sa Mayo 9-13 sa pagbalidab sa mga mamistahay nga mangayo og pahilis. 

Apan ngadto sa mga resorts ug tindahang may giserbisyohang mga turistang langyaw nga dili mobotar sa Pilipinas, maneguro na og kuha sa excemption gikan sa Provincial COMELEC aron dili makasuhan, awhag sa Comelec pinaagi ni Atty. Biliran. 

Bisan sa gipasabot nga excemption sa liquor ban ngadto sa mga resorts nga nag-alagad sa mga langyaw nga turista, kinahanglan kini nga paga-aplayan, butyag sa COMELEC. 

May mga deputized nga ahensya sa kagamhanan nga gitahasan sa COMELEC sa pagsuta kon ang liquor ban gituman ba. 

Sa mga masakpang misupak niini, mahimong kasohan, subay sa mga balaod sa eleksyon, butyag sa Comelec. 

Usa ka tuig ngadto sa unom ka tuig nga pagkabilanggo, bug-at nmga silot nga dila gani maka-apply sa probation tungod kay kini supak sa special laws, dugang sa mga tinugyanan.

===========

Balota’ng kasuwayan pagfill-up 

naa sa www.comelec.gov.ph

Rey Anthony Chiu 

TAGBILARAN CITY, Bohol, May 6, 2013 (PIA) –Sa kabag-ohan nga dala sa automated elections ug sa posibilidad nga masayang ang boto sa sayop nga pagpuno sa gipili, gibuksan sa Commission on Elections (COMELEC) ang panudlo alang sa tukmang pagfill-up sa balota. 

Pinaagi sa pag-log on sa website sa Comelec, mahimo na sa us aka botante nga modownload sa us aka sample ballot nga iyang suwayan og fill-up subay sa pamaagi nga gitugot. 

Ang COMELEC Website makita sa pagtype sa www.comelec.gov.ph ug dayon pili-a ang ballot templates sa ubos sa logo sa Comelec nga igkita sa tuo nga bahin sa webpage. 

Mahimo usab nga adto pindoton ang espesyal nga menu nga mogawas kon masumpay ka na sa comelec website. 

Makita didto sa special nga dropdown menu ang option nga Check the ballot templates for the 2013 National and Local Elections. 

Kon mapili na ang ballot templates, pangitaa ang imong rehiyon, lalawigan, lungsod ug dayon i-download kini aron maprinta ug mahimo mo na nga praktisan sa pagfill-up. 

Mipahimangno usab ang Comelec nga kon maghimo sa pagfill-up, kinahanglang nga pun-on gayud sa pagmarka ang oval nga magtimaan sa imong pagbotar sa us aka kandidato. 

Gani, sugyot sa COMELEC nga mogamit na lamang sa markers nga gamit sa Comelec sa pag fill-up tungod kay may mga kaso na nga dili basahon sa PCOS ang agi sa blue ballpen. 

Gawas niana, gisugyot usab sa Comelec nga dili gayud pasobrahan sa pagbotar ang us aka posisyon nga usa lamang ang giokinahanglang pili-on. 

Kini nga mga posisyon naglakip sa Partylist representative, Kongresista, Gobernador, Bise Gobernador, Mayor ug Bise Mayor. 

Napulo ug duha ka kandidato ang pili-on sa pagka senador, tulo sa pagka bokal sa unang distrito, tulo sa ikaduhang distrito ug upat sa ika tulong distrito. 

Sa matag lungsod, 8 ka konsehal ang pili-on, pahimangno sa poll agency.