Thursday, May 30, 2013

Orientation sa “forestry laws” ug 
Kalikopan himoon alang sa MFPC
Rey Anthony Chiu

TAGBILARAN CITY, Bohol. May 29, 2013 (PIA) – Himoon ang usa ka orientation sa mahinungdanong mga balaod sa forestry ug mga balaod sa kalikopan alang sa mga sakop sa Multi-Sectoral Forest Protection Committee (MFPC) sa lalawigan sa Bohol karong Hunyo 4, 2013. 

Ang orientation kalabut na usab sa mga pagpangandam sa pagmugna sa usa ka MFPC action plan nga maoy himoong gabay sa komitiba sa paghimo sa mga programa alang niini, matud ni Emilia Roslinda, tsirman sa MFPC.

Ang orientation alang sa mga sakop sa MFPC adto sa Jjs Seafood Village sa K of C Drive sa Martes pohon sugod sa alas 9:00 sa buntag hangtud mahuman. 

Kahinumduman nga daghan na nga mga programang napatuman sa mga nagkadaiyang sector sa lalawigan subay sa pagpahiuli sa mga kalasangan ang karon nangapalpak tungod ra usab sa sukwahi nga balaod. 

Samtang may mga lokal nga kagamhanan nga nagpatuman sa roadside reforestation og beautification projects, may mga lugar usab nga ang gipangtanum nangaligsan sa pagpalapad sa mga agi-anan. 

Laing kasinatian usab ang pagpamutol sa mga kahoy nga gitanum daplin sa kalsada tungod sa kahadlok nga kini mosangko sa mga linya sa koryente ug maka-ingon sa sunog o disgrasya, subay sa rason sa mga power utilities. 

Kining pipila ka mga kasinati-an nagtug-an nga may kakuwangan gayud sa usa ka komprehensibo nga laraw alang sa pagtabang aron pagpahiuli sa kalasangan nga nag-anan na og ka nipis.

Matud usab sa mga sakop sa MFPC, ang paghimo sa usa ka komprehensibo nga action plan alang sa reforestation ug sa programang forestry sa Bohol usa ka lakang sa tukmang paing-anan. 

Daghan na mga mga local nga kagamhanan nga nagpabilin nga dili ikapatuman ang ilang mga laraw sa reforestation tungod kay walay tukmang plano kon asa dapita sa ilang mga lungsod ang mahimong himo-an sa proyekto. 

Ang paghimo sa Action Plan sa MFPC gilauman usab nga magtanyag na sa mga tubing niining samang mga suliran. 

============
APC mibansay-bansay sa social media aron
dugang pamaayohon pa ang ilang serbisyo
Rey Anthony Chiu

TAGBILARAN CITY, Bohol. May 29, 2013 (PIA) – Gipaabut ang mas paspas pa nga pagpakatap sa mga kasayuran, pahibalo ug teknolohiya nga saw-han sa mga agricultural technicians ug extension workers sa Department of Agriculture (DA) Agricultural Promotion Center (APC).

Kini human gitak-opan didto sa Bohol APC Training Center ang usa ka adlaw nga Basic Social Media Training alang sa mas epektibo nga serbisyo sa kagamhanan nga gitanyag sa Philippine Information Agency sa Bohol Mayo 29. 

Giangkon ni Adoracion dela Cruz, information officer sa APC nga ang social media networking usa ka bag-ong nabukas nga pultahan diin ang APC mahimong mogamit aron mas mapamaayo pa ang ilang serbisyo. 

Gawas sa paspas ug realtime nga paghatud sa kasayuran pinaagi sa facebook, twitter, instagram foto sharing ug uban pang kahimanan sa teknolohiya, usa usab kini ka epektibong agi-anan aron ang usa ka tawo makapangutana’g balik ngadto sa APC sa iyang mga gipanghatag nga serbisyo. 

Midason usab si Engr Eugene Cahiles, project manager sa Bohol APC nga ang social media karon dili na mahimong ibalewala sa pag-ambitay sa kasayuran. 

Kaniadto, ang mga buhatan sa kagamhanan nagsalig lamang sa pagpadala sa suwat kon adunay ipahibalo sa iyang mga kliyente.

Apan ang pagbukas sa internet ug sa ubang mga pasilidad aron mas dali ang pagpakatap sa kasayuran mi-abli usab sa lapad nga posibilidad sa mapamaayo pa sa serbisyo ilabi na sa paspas nga pag-ambitay sa kasayuran, dason ni Engr Cahiles. 

Hinuon, mipahimangno ang PIA Bohol nagdto sa mga empleyado sa kagamhanan sa paghimo og pagtanda sa social media sites sa opisyal lamang nga kapasidad aron dili mabiyaan ang trabaho.

No comments: