Thursday, May 02, 2013

Paspas nga poll results giseguro, 
Hinay, walay signal natumbok na 
Rey Anthony Chiu 

TAGBILARAN CITY, Bohol, Mayo 1, 2013 (PIA) – Gipangtumbok na sa Commission on Elections (COMELEC) kadtong mga lugar nga dunay hinay o walay signal sa cellular phones nga maoy sakyan sa signal pagpadala sa resulta sa piliay. 

Kini usab subay sa pamaagi nga mas paspas ang pagpasa sa mga resulta sa piliay nga ma-ihap sa Precinct Count Optical Scanner (PCOS) human makabotar ang tanan. 

Dinhi sa Bohol, natumbok na usab sa mga tinugyanan sa mga Telephone companies (TELCO) ang mga lugar nga may hinay o walay signal. 

Matud sa mga tinugyanan sa mga TELCOs, kadtong mga lugar nga wala, o hinay ang signal ta-udan sa gitawag nga Broadband Global Area Network (BGAN) o Very Small Aperture Terminals (VSAT) aron may makasagap sa signal inig palupad sa mga election returns. 

Hinuon, wala hinganli sa mga otoridad sa TELCOS ang mga lugar diin nila ipahimutang ang mga ekipos, aron panalipdan usab ang seguridad ning mga tandugon nga gamit teknolohikal. 

Gipahayag na usab ni Comelec Chairman Sixto Brilliantes nga “hapit na mahuman ang pag testing sa pagpadala sa mga mga resulta gikan sa mga lugar nga natumbok, ug kadtong may hinay o walay signal, may ipahimutang nga kahimanan aron mosilbi nga signal booster. 

Una na nga gipaambit ni Bohol Comelec Supervisor Atty Marco Leonil Castillano nga ang tulo ka mga telcos nga padalhan sa mga resulta sa piliay, mag-gahin ug laing band nga sakyan sa resulta sa ilang pagpadala ngadto sa mga tabulation centers. 

Niini, matud niya, dili na maghout ang linya sama sa nahitaboi kaniadto. 

Ang gipahat nga espesyal nga linya alang sa pagpadala sa resulta sa piliay dili sama sa mga linya nga agi-an sa mga text messages ug packet data sa mga mobile users, bungat ni Castillano. 

Nasayran nga tulo ka Subscriber Information Module (SIM) Cards ang gamiton sa pagpadala sa mga resulta: Smart Communications, Sun Cellular ug Globe Telecoms. 

Kini aron pagseguro nga paspas ang paglabay sa mga resulta ngadto sa mga servers sa Comelec. (30/gg) 

=============
Chatto mipapanumpa sa 
Mga opisyales sa KABOG 
Rey Anthony Chiu 

TAGBILARAN CITY, Bohol, May 1, 2013 (PIA) – Sa ka guot sa mga buhaton ni Gopb. Edgar Chatto, nasingit pa niya ang pagpakighimamat sa mga sakop sa Kahugpungan sa mga Bol-anong Tour Guides (KABOG) Incorporated atul sa ilang pagpanumpa sa bag-ong opisyales. 

Mismong si Gob. Chatto ang mipa-panumpa sa mga tour guides, atul usab sa ilang familiarization tour sa Bohol Tourism Complex ug sa La Manoc Mystical Island sa mia-ging semana. 

Gidayeg usab ni Chatto ang mga sakop sa Kabog, ilabi na sa iyang mga nabati nga mga maayong feedback gikan sa mga bisita sa Bohol. 

Gitumbok usab ni Chatto ang ka maayo sa pundok nga giapilan sa pipila ka propesyonal ug sa mga awardees sa Department of Tourism. 

Ang mga gipapanumpa nga sakop sa Board of Trustees sa Kahugpungan sa mga Bol-anon nga Guides (KaBoG) Incorporated, naglakip nila ni Teresa Mapute (President), Vice President Doris Dinorog-Obena, Secretary Roy Ometer, Treasurer Mayflor Ferre, Assistant Treasurer Elmer Hamili ug Board of Trustees. 

Members sa Board of Trustees sila Committee on Training and Development Chair Erico Joseph Cañete, Committee on Social Development Chair Cristopher 'Boyet" Boncales, Committee on Membership Chair Nerisa Caong ug Committee on Election Chair Cecile Remolador. 

Gipapanumpa usab isip Press Relations Officers sila Arre Omar Kibir, Emmylou Palacio-Noel ug Marlyn Petalcorin. 

Ang KABOG usa ka Securities and Exchange Commission registered nga grupo ug sakop sa Department of Tourism Accredited Tour Guides. (30)

============
“Final Testing ug Sealing” sa 
mga gamit sa piliay, Mayo 8 
Rey Anthony Chiu 

TAGBILARAN CITY, Bohol April 30, 2013 (PIA) –Inay sa Mayo 4, adto na sa Mayo 8 ipahigayon ang Final Testing and Sealing sa mga gamit alang sa piliay sa Mayo 13, 3013. 

Kini maoy gibutyag sa Commissione on Elections pinaagi ni Atty Ricardo Villares, atul sa programa sa radio nga Mga Gutlo sa Kaalam uban sa COMELEC. 

Segun sa balaod, ang opisyal nga buhat sa final testing and sealing sa mga gamit sa dili pa ang piliay mahimo nga sulod sa 7 ka adlaw sa dili pa ang piliay, apan kinahanglan gayud nga dili mokubos sa tulo ka adlaw ang testing sa dili pa ang piliay. 

Kini, matud sa Comelec Resolution, aron makahatag pa sa igo nga panahon sa mga Comelec officers sa kalungsuran sa pag-papuli sa mag gamit nga gili mogana sa panahon na sa piliay. 

Ang Final Testing and sealing gibuhat sa kagamhanan subay sa pagtuo nga kon ikapakita sa katawhan nga suwayan og pagpadagan ang Precint Count Optical Scanner ug sutaon nila kon dili ba kini magluwas sa sayop nga ihap, mas katuohan ang piliay. 

May 10 ka balota nga botaran sa mga katawhan atul sa Final Testing and Sealing. 

Human kini mabutangi sa mga pangalan sa mga kandidato, ihungit kini sa makina aron iphon. 

Gawas sa otamatik nga ihap sa makina, maghimo usab ang mga tinugyanan sa Comelec sa manwal nga pag-ihap sa boto aron sutaon kon may tikas ba ang ihap sa makina, matud ni Atty Villares. 

Lakip usab sa testingan mao ang kontrobersyal nga Compact Flash (CF) Cards nga maoy mahimong sudlan daan sa mga commands kon may buot bang manikas. 

Kon mapamatud-an nga nag sibo ang resulta sa outomated count ug manuwal nga ihap, ug walay diperensya ang PCOS, CF Cards ug uban pang gamit sa piliay, selyohan na kini atubangan sa katawhan. 

Tungod sa ka-mahinungdanon sa Final testing and Sealing, giaghat sa Comelec ang katawhan sa pagtambong aron pagsaksi niining kalihukan. 

Ang Final testing and Sealing sa mga gamit adto pagahimoon sa usa ka lugar nga itumbok sa Comelec Officer sa lungsod, ilabi na kon mas hasul og gasto ang pagpadala sa tanang PCOS ug gamit ngadto sa tanang mga presinto. (30/gg) 

=============
Abatan, himo-an og shoot sa 
Salida nga “Bamboo Flower” 
Rey Anthony Chiu 

CORTES, Bohol April 29, 2013, (PIA) – Usa ka salida sa sine ang i-shoot na usab dinhi sa Bohol, particular sa Suba sa Abatan, sa Alicia ug sa Anda. 

Mismo ang multi-awarded nga Bol-anong director sa sine ug telebisyon ang mipadayag sa balita ngadto sa mga Bol-anon kinsa nalipay sa maong kaugmaran. 

Si Director Maryo delos Reyes mibutyag nga ang proyekto nga gipundohan sa sa Film Development Council of the Philippines (FDCP) usa ka tukmang pasidungog sa nga beteranong film-makers kinsa nakatabang pag-kulit sa kasaysayan sa mga salidang Pilipino. 

Si direk Maryo de los Reyes usa sa 12 ka filmmakers nga napili sa FDCP nga mosalmot sa 2013 Sineng Pambansa: Masters Edition nga ipagawas sa Septembre ning tuig. 

Lakip sa kasabutan sa paghimo ning mga salida sa 12 ka mga film-makers: nga ang mga salida adto kuhaaon sa ilang tagsa-tagsa ka mga lalawigan. 

Alang kang delos Reyes, ang iyang salida nga giulohanan og “The Bamboo Flower,” magtangag sa mga inilang magdudula sa sine sama nila ni Mylene Dizon, Max Collins, Neil Ryan Sese, Diva Montelava, Orlando Sol ug get Sef Cadayona. 

Ang salida, nga i-shoot sa Abatan, sukwahi sa unang mga taho nga adto sa Loboc, magtuki sa sugilanon sa mga kabataan samtang magtandi kanila sa usa ka banay sa kawayan. 

“Nindot kayo ang mga buwak sa kawayan, nagdagway silag mga parte sa candelero. Apan, nindot man sila nga tan-awon, ang ilang presensya nagtug-an nga himalatyon na ang kawayan, matud pa ni delos Reyes.” 

Sa maong kalambuan, nalipay usab si Emilia Roslinda, executive Director sa PROCESS ug maoy nagdumala sa Abatan River Community Life Tours, kinsa usab nagtabang sa mga komunidad sa suba aron makabaton ug dugang kita ug kapanginabuhi-an. 

Ang paghimo sa salida sa Abatan usa ka dako nga promosyon sa turismo nga magdalag dugang kaayohan sa Bohol, matud ni Roslinda. (30/ed) 

No comments: