PNoy, dili uyon nga i-oktaba ang barangay ug SK eleksyon

TAGBILARAN CITY, Bohol, May 21 (PIA)--Dili uyon si Presidente Benigno ‘Noynoy’ Aquino III sa planong i-oktaba ang gitakdang barangay ug Sangguniang Kabataan (SK) eleksyon sa Oktubre tungod kay wala man siya’y nakitang igong rason aron i-oktaba pa kini.

Ang Presidente nagkanayon nga angay kayahon sa Commission on Elections (Comelec) ang eleksyon tungod kay gikuyawan siyang mausab napud ang pag-oktaba niini.

Giingong angay mopatigbabaw ang mandato sa katawhan nga mopili og mamuno sa ilang barangay.

Kahinumdoman nga mismong si Comelec Chairman Sixto Brillantes ang niingon nga andam nilang irekomendar sa Kongreso ang pag-oktaba sa maong eleksyon tungod sa kakulang sa pagpangandam tungod usab sa bag-o lamang nahuman nga midterm eleksyon. (PIA-Bohol/ecb/i-gg)

============

‘Sajahatra’ caravans, gitakdang sugdan sa Hunyo

TAGBILARAN CITY, Bohol, May 21 (PIA)--Gitakdang sugdan sa Hunyo 1 ang Sajahatra Bangsamoro caravans.

Base kini sa Joint Coordinating Committee (JCC) sa Government of the Philippines (GPH) ug Moro Islamic Liberation Front (MILF).

Niadtong milabay nga Mayo 9 ug 10, ang mga miyembro sa GPH Task Force on Bangsamoro Development, MILF Task Force Sajahatra ug MILF Project Management Team (PMT) nipahigayon og panagtapok sulod sa duha ka adlaw aron hisgotan ang pagpangandam alang sa gitakdang provincial caravans sa Sajahatra Bangsamoro program nga inisyatibo ni Presidente Benigno Aquino III human gilagdaan ang Framework Agreement on the Bangsamoro (FAB) niadtong Oktubre, 2012.

Sa maong panagtapok, ang MILF PMT ni-presentar sa listahan alang sa 10 ka lugar diin ipahigayon ang program caravan.

Apil sa mga lugar nga gi-konsiderar mao ang Tawi-Tawi, Basilan, Lanao del Sur, Sulu, Zamboanga Sibugay, South Cotabato, Davao Oriental, North Cotabato, Lanao del Norte, ug Maguindanao.

Ang maong caravan gilauman nga molanat hangtud Nobyembre ning tuiga.

Ang GPH Task Force on Bangsamoro Development gipangulohan sa Office of the Cabinet Secretary sa pakigtambayayong sa Department of Health (DOH), Department of Education (DepEd), Department of Social Welfare and Development (DSWD), Philippine Health Insurance Corporation (PhilHealth), Commission on Higher Education (CHED), Department of Agriculture (DA), Technical Education and Skills Development Authority (TESDA) ug Office of the Presidential Adviser on the Peace Process (OPAPP) ug sa uban pa. (PIA-Bohol/ecb/i-gg)

=============

Mga nidaug nga local officials,

gipaandam na sa DILG sa panahon sa kalamidad

TAGBILARAN CITY, Bohol, May 21 (PIA)--Bisan sa Hulyo 1 pa mosugod sa pangatungdanan ang mga nidaug sa local government executive sa bag-o pa lamang nahuman nga piniliay, may gimando na sa ilaha si Interior and Local Government Secretary Mar Roxas.

Matud pa ni Roxas, ipakatap nila sa mga LGUs ang mga impormasyon sa mga lugar nga gikonsiderar nga high-risk areas ilabi na karong mosulod na ang panahon sa ting-ulan. 

Giingong kining mga lugar mao ang gilakip ug gi-ila sa Department of Environment and Natural Resources (DENR) ug Department of Science and Technology (DOST) nga mga delikado.

Si Roxas nagkanayon nga obligasyon sa mga bag-ong gobernador, mayor ug uban pang lokal nga opisyal nga ibakwit na samtang sayo ang ilang mga ginsakpan nga nagpuyo sa mga lugar nga daku ang posibilidad nga maigo sa pagbaha ug pagdahili sa yuta. 

Dugang pa ni Roxas, 22 ka bagyo ang kasagarang mosulod matag tuig base sa pahayag sa Philippine Atmospheric, Geophysical and Astronomical Services Administration (PAGASA) - DOST.

Gipahinomdoman sa kalihim ang mga molingkod nga local government executive nga himuon ang ilang trabaho ug dili mahimong parte sa problema. (PIA-Bohol/ecb/i-gg)

==============

Saudi ug PH, milagda og kasabotan nga mo-protehir sa mga Pinay DH

TAGBILARAN CITY, Bohol, May 21 (PIA)--Milagna og kasabotan ang Kingdom of Saudi Arabia (KSA) ug Pilipinas nga naggarantiyang mahatagan gayud og saktong benepisyo ang mga Pinay domestic helpers nga nagtrabaho didto.

Gi-isip nga makasaysayan ang maong kasabotan nga nagtinguhang protektahan ang libuan ka kababayen-an nga biktima sa pang-abuso.

Matud pa ni Department of Labor and Employment (DOLE) Secretary Rosalinda Baldoz, ang maong kasabotan naggagarantiya sa mga Pinay domestic helpers nga mahatagan gayud og mga benepisyo sama sa day off. 

Tungod kay bag-ong lakang man kini sa duha ka nasud, naglaum si Baldoz nga makuhaan na kun dili man gani padayon nang mapapas ang kaso sa pagpang-abuso sa mga OFWs. 

Gibanabanang naa sa 60,000 ka domestic helpers gikan sa kinatibuk-ang 670,000 ka Pinoy sa Saudi Arabia ang makabenepisyo niining maong kasabotan. (PIA-Bohol/ecb/i-hd)