PNoy: No-El scenario, imposibleng mahitabo 

TAGBILARAN CITY, Bohol, May 10 (PIA)--Mismong si Presidente Benigno “Noynoy” Aquino III ang miingon nga walay angay ikabalaka sa supply sa kuryente ilabi na sa mismong adlaw sa piniliay sa Mayo 13. 

Kini human sa nasinating halapad nga brownout sa Luzon kagahapon nga niresulta sa kabalaka sa katawhan. 

May mga nagpagawas usab nga tabi-tabi nga giingong anggulong ‘dry run’ ang brownout sa no-election sa Lunes. 

Apan giseguro ni Presidente Aquino nga igo ang supply sa kuryente ug dili na mahitabo pa og balik ang nahitabong perwisyo kagahapon. 

Matud pa sa Presidente, nipahigayon na og imbentaryo ang Department of Energy (DoE) sa mga planta ug transmission lines aron matino ang kapasidad sa koryente sa mosunod nga mga adlaw. 

Giseguro sa Presidente nga hanap ug dili mahitabo ang gikahadlokang no-el scenario tungod siya mismo walay interes nga i-oktaba ang piniliay. 

Gitumbok pa niya nga all-set na sila sa eleksyon ug andam na ang preparasyon sa mga ahensya sa gobyerno ilabi na sa seguridad sa piniliay. (PIA-Bohol/ecb/i-gg) 

=============

Source code sa PCOS, selyado ug gi-deposito na sa BSP 

TAGBILARAN CITY, Bohol, May 10 (PIA)--Gi-prisintar na sa Commission on Elections (Comelec) ang source code sa mga PCOS machines nga gamiton karong 2013 automated midterm elections. 

Atubangan sa mga opisyal sa Comelec, Smartmatic, media ug uban pang interesadong partido, gihatag ni Michael Santos sa Systest Labs Inc. (SLI) Global Solutions ang disc diin nahisulod ang source code nga gikan sa Dominion Voting Systems. 

Ang SLI ang independent party nga unom ka buwang nisusi sa source code agig pagsunod sa balaod. 

Kahinomdoman nga nadamay ang source code nga gamiton sa piniliay sa Pilipinas sa away sa Smartmatic ug Dominion kalabot sa kontrata nga naule pa sa pagpasaka og kaso sa Estados Unidos. 

Human magkauyon ang Smartmatic ug Dominion, nadawat na gyud sa Comelec ang source code nga maoy instruction nga mabasa kun unsaon pag-operate ang PCOS machines partikular na sa pag-ihap, canvassing ug pag-transmit sa mga boto. 

Gikopya kini dayon sa computer sa Comelec aron daling ma-access ug masusi sa mga political parties. 

Gikan sa Comelec, gidala ang source code sa Bangko Sentral ng Pilipinas (BSP). (PIA-Bohol/ecb/i-gg)

==============

Bansay sa mga Bol-anong 

Bloggers himoon Mayo 24 

Rey Anthony Chiu 

JAGNA, Bohol, May 9, 2013 (PIA) –Usa ka seminar workshop alang sa mga bloggers ang ipahigayun sa Bohol karong Mayo 24. 

Ang seminar nga gianyag sa Bohol Information Communication Technology Council, Bohol Bloggers Society ug Cebu Bloggers Society, dumalahon sa mga gitamud nga propesyonal ug impluwensyado nga bloggers sa nasud. 

Ang “Blog@Talks Seminar Workshop” himoon sa Bohol Tropics gikan sa alas 8 ngadto sa alas 5 sa hapon, matud sa mga tigpasiugda. 

Tumong sa maong bansay-bansay ang paghatag og mga sekretong panudlo sa mga Bol-anong bloggers kinsa naghimong pag-promote sa turismo, negosyo pinaagi sa internet. 

Usab ang kalihukan maghatag sa mga sekreto sa pangwarta, pagbayloay sa mga kasinati-an sa mga bloggers sa rehiyon ug pagpabarug sa kahugpungan sa mga Bol-anong bloggers. 

Matud sa mga tigpasiugda, ang bansay-bansay magkobra sa registration nga P200 alang sa mga estudyante ug P400 alang sa mga propesyonal nga unang magpareghistro. 

Hinuon, mosaka na ngadto sa P500 ang registration sa mga propesyonal human sa Domingo, Mayo 12, matud ni Dalareich Polot, founder sa Bohol Bloggers Society. 

Tumong usab sa kalihukan ang dugang kampanya alang sa pagsabot sa mga tawong dunay lahi nga sakit sa alopecia.