SC, nipagawas og TRO batok sa extended liquor ban 

TAGBILARAN CITY, Bohol, May 09 (PIA)--Nipagawas karon og temporary restraining order (TRO) ang Supreme Court (SC) batok sa pagpatuman sa gi-uswag nga liquor ban nga magsugod unta ugmang adlawa. 

Sa press briefing ganina, gi-anunsyo ni Atty. Theodore Te, pangulo sa Public Information Office sa SC nga gi-paboran sa mga mahistrado ang petisyon sa Food and Beverage Inc. ug International Wines and Spirits Association nga pugngan ang Commision on Elections (Comelec) sa pagpatuman sa gi-uswag nga liquor ban. 

"The courts resolves to issue a TRO effective immediately enjoining respondent Comelec from implementing liquor ban," matud pa ni Te. 

Magsugod unta karong adlawa Mayo 9 ang extended liquor ban ug molanat hangtud sa Lunes, Mayo 13, adlaw sa piniliay. 

Apan tungod sa TRO, ipatuman ang liquor ban sulod lamang sa duha ka adlaw nga magsugod karong  Mayo 12 hangtud sa 13. 

Gimanduan usab sa Korte Suprema ang Comelec nga mo-sumiter og komento sa petisyon sa dili pa mag alas 5:00 karong hapon. (PIA-Bohol/ecb/i-gg) 

==============

Comelec, nipasidaan nga arestohon ang BEI’s nga dili motunga sa piniliay 

TAGBILARAN CITY, Bohol, May 09 (PIA)--Nipasidaan ang Commission on Elections (Comelec) nga arestuhon ang mga board of election inspector (BEI) nga dili motunga sa adlaw sa piniliay. 

Matud pa ni Comelec Chairman Sixto Brillantes nga kun maaresto sila, dili na sila tugotan nga molingkod isip BEI ug hulipan sa mga police trainee nga una nang gibansay aron mosilbi isip BEI. 

Kini human nakadungog og mga pasidaan ang Comelec chairman sa pipila ka municipal election officer nga dili motunga sa Mayo 13 tungod sa pagpanghulip og election officers. 

Giingong partikular na sa Lanao del Sur diin 250 ka police trainees ang gibansay sa Comelec. 

Gikatakdang mobisita sa Autonomous Region in Muslim Mindanao (ARMM) si Brillantes sa dili pa ang piniliay aron pulongon niya ang mga provincial election officer didto. 

Gikonsiderar sa Comelec nga dakung lakang ang gihimong paghulip sa election officers sa Lanao del Sur ug Maguindanao diin didto kasagaran mahitabo ang failure of election ug postponement sa eleksyon. (PIA-Bohol/ecb/i-gg)