Monday, June 24, 2013

Bag-ong botante, makaparehistro na sa Hulyo 22-31

TAGBILARAN CITY, Bohol, June 24 (PIA)--Gitakda sa Commission on Elections (Comelec) sa Hulyo 22-31 ang voters registration alang sa barangay ug Sangguniang Kabataan (SK) elections.

Matud pa ni Comelec Chairman Sixto Brillantes Jr., mahimong magpatala ang mga botante sa pinakaduol nga buhatan sa Comelec gikan Lunes hangtud Sabado, sugod alas 8:00 sa buntag hangtud sa alas 5:00 sa hapon. 

Pasabot ni Brillantes, ang voters registration parte sa ilang preparasyon alang sa piniliay nga gitakdang ipahigayon sa Oktubre 28, 2013.

Opisyal nga magsugod ang panahon sa eleksyon sa Setyembre 28 nga molanat og 30 ka adlaw sa dili pa ang mismong adlaw sa piniliay. 

Ang filing of certificate of candidacy (COC) gitakda sa Oktubre 15 hangtud 17 samtang ang campaign period usab gikan Oktubre 18 hangtud 26. 

Ipatuman ang liquor ban usa ka adlaw sa dili pa ang piniliay ug sa mismong adlaw sa piniliay sa Oktubre 28. 

Ning bag-o lang, nagtukod og steering committee ang Comelec aron maoy magduma sa preparasyon sa maong piniliay.

Gikatakdang magpulong ang maong komite matag Lunes ug paminawon usab ang report niini kalabot sa preparasyon sa Comelec en banc matag Martes.

Ang maong Barangay ug SK polls steering committee gipangunahan ni Comissioner Christian Robert Lim, samtang miyembro niini silang Commissioners Grace Padaca, Luie Guia ug Al Parreno. (PIA-Bohol/ecb)

============
PH-MILF formal peace talks, ipadayon sa Hulyo

TAGBILARAN CITY, Bohol, June 24 (PIA)--Gikumpirmar karon ni Government of the Philippines (GPH) peace panel chair Miriam Coronel-Ferrer nga gitakda sa umaabot Hulyo ang sunod nga formal talks sa Moro Islamic Liberation Front (MILF). 

Matud pa ni Ferrer, sentro sa panaghisgot ang mga annexes sa wealth sharing, power sharing ug normalization.

“The panel chairs have already agreed on a date early next month to further discuss the annexes on wealth sharing, power sharing and normalization,” matud pa ni Ferrer.

Giingong gihatagan na usab ang counterpart sa kompletong proposal sa gobyerno kalabot sa wealth sharing annex aron matun-an kini sa MILF.

Masaligon usab si government peace panel member Senen Bacani nga malagdaan ang comprehensive agreement sulod lamang sa usa hangtud duha ka buwan. 

Gitumbok ni Bacani nga ang nahabiling annexes nga pagahisgotan mao ang pinakalisud mao nga kun mahuman na kini, dali nang mapalig-on ang kasabotan nga wala nay babag sa hisgotang legal ug constitutional. 

Silang Ferrer ug MILF chief negotiator Mohagler Iqbal nihimo na og informal talks sa Norway diin nitambong usab silang duha sa Oslo Forum 2013 nga gi-organisa sa Norwegian Ministry of Foreign Affairs sa Center for Humanitarian Dialogue niadtong Hunyo 18 ug 19. 

Kahinomdoman nga gilangayan na ang MILF ilabi na ang giingong mga ground commanders tungod kay nadugay ang panagsinabotay sa nahabiling annexes. (PIA-Bohol/ecb)

No comments: