BIR: Pagpatuman sa pagbag-o sa resibo, dili na i-uswag pa

TAGBILARAN CITY, Bohol, June 11 (PIA)--Ipadayon pa gihapon sa Bureau of Internal Revenue (BIR) ang implementasyon sa bag-ong sumbanan sa pag-iysu og resibo taliwala sa mga panawagan sa daghang sektor nga i-uswag una kini.

Matud pa ni BIR Commissioner Kim Henares, gihatagan na nila og igong panahon ang mga negosyante kalabot sa ipatuman nga pagbag-o sa resibo. 

Gitumbok niini nga gihatagan man nila ang mga adunay negosyo hangtud Abril 30 aron pangayuon sa BIR ang bag-ong resibo o ang paghatag og ‘authority to print’.

Ubos sa BIR regulations, ang mga daang resibo magamit na lamang hangtud Hunyo 30.

Una nang nihangyo si Sergio Ortiz-Luis, presidente sa Philippine Exporters Confederation (Philexport) ug opisyal usab sa Philippine Chamber of Commerce and Industry (PCCI) nga unta mohatag pa og extension ang BIR.

Nagtuo si Ortiz-Luis nga kadaghanan sa mga negosyo sa nasud dili pa andam sa pagpatuman sa implementasyon sa Revenue Regulations No. 18-2012. (PIA-Bohol/ecb)

============

Pagdeklarar sa gastos sa mga kandidato, hangtud Hunyo 13 nalang 

TAGBILARAN CITY, Bohol, June 11 (PIA)--Gitataw sa Commission on Elections (Comelec) nga dili na nila i-uswag pa ang deadline sa pagsumitir sa Statements of Election Contributions and Expenditures (SECE) nga gitakda sa Hunyo 13, 2013.

“There’ll be no extension. We discussed that already with the commission en banc,” pagbutyag ni Comelec Commissioner Christian Robert Lim sa usa ka press conference nga gimugna sa Philippine Center for Investigative Journalism (PJIC) sa syudad sa Quezon kagahapon. 

Matud pa ni Lim, gihatagan lamang nila ang mga nidaug ug napilde nga kandidato sa niaging Mayo 13 eleksyon hangtud Hunyo 13, Huwebes, taman sa alas 5 sa hapon aron magdeklarar sa ilang mga nadawat nga donasyon ug nagastos sa tibuok election period.

Ubos sa Comelec Resolution 9476, obligado ang tanang mikandidato sa nasudnon ug lokal nga elections nga mosunod sa mga patakaran kalabot sa campaign finance.

Gipahinumdoman usab ni Commissioner Lim ang mga kandidato nga sundon gayud ang bag-ong requirement sa pagdeklarar sa ilang SECE ug paggamit lamang sa prescribed format aron dili kini makonsiderar nga ‘not filed’. (PIA-Bohol/ecb)

=============

115th PH Independence Day, isaulog sa mga Bol-anon 

TAGBILARAN CITY, Bohol, June 11 (PIA)--Pangunahan sa kagamhanang probinsyal sa Bohol ang kasaulogan sa ika-115 nga anibersaryo sa kagawasan sa atong nasud ugma, Hunyo 12, 2013.

Nagdala sa tema nga: “Kalayaan 2013: Ambagan tungo sa Malawakang Kaunlaran”, yano apan mabulokong kalihokan ang ipahigayon ugma sa St. Joseph Cathedral ug Plaza Rizal sa syudad sa Tagbilaran.

Ang selebrasyon pagasugdan sa usa ka Balaang Misa sa alas 7:15 sa buntag nga ipahigayon sa St. Joseph Cathedral.

Sundan kini dayon sa simultaneous ringing of church bells, blowing of horns ug pagpatingog sa sirena.

Human niini, ipahigayon dayon ang foyer honor, wreath laying ug flag raising ceremony didto sa Plaza Rizal.

Inig alas 9 sa buntag, usa ka commemorative program ang mosunod dayon.

Ang mga kawani sa kagamhanang probinsyal, nasudnong ahensiya sa gobyerno ug mga local nga opisyal ang gipaabot nga manambong sa maong kasaulogan. (PIA-Bohol/ecb)