CSC: pagdala ug pag-inom og bino, 

bawal sa mga buhatan sa gobyerno

TAGBILARAN CITY, Bohol, June 05 (PIA)--Bisan nalibkas na ang duha ka adlaw nga liquor ban sa niaging midterm election, bawal pa gihapon magdala ug mo-inom og mga ilimnon nga makapahubog sa mga buhatan sa gobyerno.

Kini ang pahinomdom sa Civil Service Commission (CSC) sa mga empleyado sa gobyerno base sa CSC Resolution 1100039 nga hugot nga nagbawal sa pag-inom og mga ilimnon nga makahubog sa oras sa trabaho.

Matud pa ni CSC Chairman Francisco Duque, ang pag-inom sulod sa oras sa trabaho o pagsulod sa trabaho nga nakainom apil sa administrative offenses nga gawas pa sa atubangon nga silot sa habitual drunkenness.

Gitogotan lamang nga mo-inom ang mga empleyado kun adunay programa, special events ug kun may pagsaulog sa mga local customs ug tradisyon.

Apan malt ug wine lamang ang mahimong imnon ug hugot nga gi-bawal ang paghubog-hubog.

Giingong mahimong manubag ang empleyado, apil na ang pangulo sa opisina.

Ang masakpan nga nakainom o naghubog-hubog sa oras sa trabaho mahimong masuspinde og usa hangtud 6 ka buwan sa unang higayon. Samtang kun mausab pa kini, mahimong matangtang na sa trabaho ang masakpang empleyado. (PIA-Bohol/ecb)

==============

DOH, nipasidaan batok sa ‘WILD’ diseases karong ting-ulan

TAGBILARAN CITY, Bohol, June 05 (PIA)--Nipasidaan ang Department of Health (DOH) sa mga ginikanan nga bantayan ang ilang mga anak batok sa ‘WILD’ diseases karong panahon sa ting-klase ug ting-ulan.

Matud pa ni DOH assistant secretary Dr. Eric Tayag, uso na karong panahon sa ting-ulan ang gitawag nga ‘WILD’ diseases o Water-borne diseases, Influenza, Leptospirosis ug Dengue diseases.

Ang water-borne diseases mao ang mga sakit nga gikan sa kontaminadong tubig tungod na usab sa mga pagbaha. Daling mataptan niini ang mga estudyante nga mosulod sa eskwelahan. 

Matud pa ni Tayag, kun maka-inom og kontaminadong tubig, mahimong magka-diarrhea o cholera ang usa ka bata mao nga angay magbinantayon ang mga ginikanan sa dehydration.

Samtang ang Influenza o trangkaso usab adunay sintomas nga ubo, sip-on ug hilanat.

Apan kun maglisud na o paspas na kaayo ang pagginhawa sa bata, angay na kining dalhon dayon sa tambalanan tungod kay mahimo kining mauli sa pulmonya.

Ug tungod kay gipaabot ang pagbaha sa pagsulod sa ting-ulan, gipa-amping sa DOH ang publiko batok sa Leptospirosis o ang bakteryang makuha sa baha nga kontaminado sa ihi sa ilaga.

Alang usab sa Dengue, maayo nga siguradohong walay lamok nga namuyo sa palibot.

Tambag sa DOH, magsul-ob og long sleeves ug pantalon aron dili mapaakan og lamok. (PIA-Bohol/ecb)