Gobyerno, nagpabiling bukas sa CPP-NPA-NDF peace talks

TAGBILARAN CITY, Bohol, June 12 (PIA)--Giseguro ni Presidential Adviser on the Peace Process Teresita Deles nga nagpabiling bukas ang gobyerno nga iduso ang kalinaw pinaagi sa peacetalks sa CPP-NPA-NDF.

Bisan nagpabilin ang commitment sa gobyerno, miingon usab si Deles nga prayoridad pa gihapon ang kaluwasan ug kaayuhan sa katawhan gikan sa kaguliyang nga gihasik sa New People’s Army. 

Gipahayag kini ni Deles atubangan sa pagkadiskaril sa peace negotiations tali sa gobyerno ug rebeldeng komunista tungod sa gihikyad nga mga kondisyon sa CPP-NPA-NDF.

Matud pa ni Deles, paningkamotan pa gihapon sa gobyerno nga tapuson ang insureksyon pinaagi sa malinawon nga paagi.

Apil na niini ang pagpatuman sa peace and development programs ubos pa gihapon sa hugot nga pagpatuman sa respeto sa katungod sa isig ka tawo. (PIA-Bohol/ecb)

=============

Daang resibo, mahimo pang gamiton taman Agosto 30

TAGBILARAN CITY, Bohol, June 12 (PIA)--Gi-oktaba sa Bureau of Internal Revenue (BIR) ang gitakda niining deadline sa pagpatuman sa bag-ong resibo.

Gipahibalo sa ahensya nga mahimo pang gamiton sa mga business establishments ang ilang mga daang official receipts hangtud Agosto 30 ning tuig tungod na usab sa hangyo sa daghang negosyante.

Pasabot ni BIR Chief Kim Henares, gi-uswag nila ang deadline aron mahatagan og igong panahon ang mga negosyante nga makapa-printa og mga bag-ong receipt form.

Gitumbok pa niini nga adunay 2,000 ka accredited printers ang BIR sa tibuok nasud nga mahimong adtuon sa mga negosyante.

Kahinomdoman nga sa gipagawas nga BIR regulations, ang mga daang resibo mahimo na lamang magamit hangtud Hunyo 30.

Una nang gipahayag ni Sergio Ortiz-Luis, presidente sa Philippine Exporters Confederation (Philexport) ug opisyal usab sa Philippine Chamber of Commerce and Industry (PCCI) nga kadaghanan sa mga negosyo sa nasud dili pa andam sa pagpatuman sa implementasyon sa Revenue Regulations No. 18-2012. (PIA-Bohol/ecb)

==============

Pagdsepensa sa teritoryo ug pagbatok sa kakabus,

Mensahe ni PNoy sa Adlaw sa Kagawasan

TAGBILARAN CITY, Bohol, June 12 (PIA)--Gipangunahan ni Presidente Benigno ‘Noynoy’ Aquino III ang selebrasyon sa Adlaw sa Kagawasan sa atong nasud kagahapon, Hunyo 12.

Sa iyang mensahe, gitimbaya ni PNoy ang tanang Pilipino nga giingong nakasinati niining kagawasan.

Gitumbok niini nga dili agresibo ang mga Pilipino, apan dili motalaw sa pagsakop sa mga langyaw.

Matud pa sa Presidente nga gitahod sa nasud ang teritoryo, katungod ug pagkataw sa ubang lahi mao nga angay usab nga mao kini ang himuon sa mga langyaw sa mga Pinoy.

"Wala naman tayong ibang pakay kundi ang pangalagaan ang tunay na sa atin. Hindi natin tinatapakan ang karapatan ng iba. Hindi natin inaangkin o sinasaklaw ang mga teritoryong malinaw namang nasa bakod ng iba."

"Wala sa kasaysayan natin ang manakit o gumawa ng anumang hakbang para magtanim ng sama ng loob ang ibang bansa sa atin... Kung may hindi pagkakasunduan, saksi ang mundo sa kahandaan nating umupo at makipag-dayalogo sa mapayapang paraaan."

"Wala sa lahi natin ang pagiging agresibo pero hindi rin tayo titiklop sa anumang hamon... Wala tayong ibang hinihingi kundi igalang ang ating teritoryo, karapatan at pagkatao tulad ng paggalang natin sa teritoryo, karapatan at pagkatao ng ibang lahi. Ginagawa natin ito dahil mulat tayong ito ang susi upang mapanatili ang istabilidad at nang sa gayo'y magpatuloy ang pagtungo sa malawakan at matagalang kaunlaran hindi lang sa loob ng ating bansa kundi sa ating rehiyon at sa buong mundo."

Gawas sa pagdepensa sa teritoryo, katungod ug pagkataw sa mga Pinoy, misaad ang Presidente nga ipadayon ang pagtutok sa mga nag-unang panginahanglan sa mga Pinoy.

Nanawagan usab siya og pakighiusa aron mabatokan ang kakabus ug uban pang hagit sa soberenya. (PIA-Bohol/ecb)

=============

Kapolisan sa Calape miaghat 

Ayaw baligya-e og sigarilyo, 

Bino ang “menor de edad”

Rey Anthony Chiu

TAGBILARAN CITY, Bohol, June 11, 2013 (PIA) –Giisip sa kapolisan sa Calape nga makatabang ang pagpakatap sa kasayuran kabahin sa pagdili sa mga menor de edad sa pagpalit og ilimnong makahubog og tabako. 

Matud ni Police Senior Inspector Rolan Aliser, hepe sa Calape, ilang gibisitahan ang mga tag-iyahag tindahan sa Calape ilabi na sa Santa Cruz ug Desamparados, aron pahimangno-an sa mandu sa balaod. 

Butyag niya, importante ang pagpahibaw sa mga natungdan sa ila unya nga dangatan kon magtuman ug magpadayon sa pagbaligya sa mga ilimnong ug sigarilyo sa mga kabatan-onan. 

Bisan giangkon sa hepe nga lisud ipatuman tungod kay may mga ginikanan nga nagpasagad, ilabi na sa pagsugo sa ilang mga anak nga menor sa pagpalit ug bino ug tabako, iyang gidason nga illegal kini subay sa balaod. 

Dugang pa, gi-paambit ni Inspector Aliser nga ila usab nga gipahimangno-an ang mga gwardiya nga nadestino sa p[agbantay sa mga tunghaan sa pagdili sa pagpasulod sa kabatan-onan nga nakainom, may bitbit nga ilimnong makahubog ug sigarilyo. 

Giaghat usab sa hepe, uban sa bahan sa kapolisan sa Calape, ang mga gwardya nga mosumbong sa kapolisan kon may namatikdan nga illegal nga buhat ang mga estudyante. 

Sa gibuhat ni Aliser ug iyang kapolisan, misalign si Mayor Sulpicio Yu nga sayon nga ipatunhay ang kahusay ug kalinaw sa lungsod. 

Giangkon usab sa mayor nga may suliran sila sa mga menor de edad, tungod usab sa hulhog nga dili matanggong sa bilangguan ang mga menor de edad. 

Si Mayor Yu ug ang lungsod sa Calape maoy host sa gipahigayon nga Talakayan sa Isyung Pulis (TSIP) didto sa Rosales Beach, Magtongtong Panggangan Island, Calape. 

Didto usab si PSSuperintendent Constantino Barot, mga hepe sa kapolisan sa San Isidro, Calape, Tagbilaran City, Buenavista, Getafe, Carmen, Sagbayan ug mga personahe sa Campo Dagohoy, aron maka-sulti sa media. 

==============

Kapolisan naghatag libreng 

Tsinelas sa Kinabag-an ES 

Rey Anthony Chiu 

TAGBILARAN CITY, Bohol, June 11, 2013 (PIA) –Gipang-apud-apod sa kapolisan sa Bohol ngadto sa mga kabataan sa Kinabag-an Elementary School (ES) sa Magtongtong Calape ang 255 ka paresan sa bag-ong tsinelas, dungan sa paningkamot sa kapolisan nga maenganyo ang kabataan sa pagtungha. 

Ang proyekto sa Bohol Philippine National Police (PNP) ilawom sa pagpangama ni PSSupt Constantino Barot, agi og pagpaambit sa kapolisan sa ilang mga grasya nga nadawat sa ilang serbisyo, matud ni Barot sa iyang pasiunang pahayag atubangan sa kabataang natapok sa nataran sa tunghaan. 

Gihimo na nga proyekto sa PNP Bohol PCR anmg libreng tsinelas alang sa mga public elementary pupils sa mga kabus nga tunghaan diin igkita gihapon ang kinaiya nga magtiniil o maggamit sa gubaon ug busloton nga stinelas sa pagsulod sa mga klase, pasabot ni PD Barot. 

Sa aghat sa mga lideres ug opisyales sa kapolisan, magtampo ug tagsa ka tsinelas ang tanang sakop sa pulis agi og bahin sa katawhan sa ilang mga gisweldo. 

Ang Kinabag-an Elementary School usa na sa pipila ka mga tunghaan sa Bohol nga nahimong benepisaryo sa libreng tsinelas nga programa sa Police Community Relations Branch sa Kampo Dagohoy. 

Gikan sa kindergarten ngadto sa Grade VI pupils, tagsa-tagsa nga gihatagan sa higayon ang kabataan sa pagpili sa ilang bag-ong tsinelas gikan sa mga paresan nga gituyoan og han-ay sa kapolisan didto sa basketbolan sa barangay Hunyo 11, 2013. 

Mismo si principal Senen Salinas, Kapitan Romeo Cuabo ug kagawad Magdalena Rosalinda mipadayag sa ilang walay sukod nga pasalamat sa kapolisan, kina mipili sa ilang eskwelahan isip benepisaryo sa proyekto. 

Gani ang kakuwang sa tsinelas dyutay lamang nga parte sa suliran sa mga nag-eskwela sa Magtongtong, usa sa duha ka kompleto nga tunghaan sa elementarya sa isla sa Panggangan, matud ni Senen Salinas, principal. 

Gawas nga amenado ang mga magtutudlo sa tunghaan sa kakuwang sa tsinelas nga usa sa makapa-aghat sa mga kabataan nga magkugi sa pagtungha, kuwang usab ang ilang classrooms. 

Unom ka mga classrooms sa eskwelahan ang gi-okupar sa grades 1-6 samtang makeshift classroom pa ang gigamit sa kindergarten didto.