Imbestigasyon sa ‘sex-for-fly’, 

target nga humanon sa Hulyo

TAGBILARAN CITY, Bohol, June 26 (PIA)--Target karon sa Department of Labor and Employment (DOLE) nga humanon sa sunod buwan ang ilang imbestigasyon kalabot sa “sex-for-fly” scandal nga gilambigitan sa mga embassy ug labor officials sa Middle East.

Matud pa ni fact-finding investigation lawyer Leah Fortuna, gikoptan na nila ang pahayag sa tulo ka Pinay overseas workers nga giingong biktima sa sexual abuse sa usa ka assistant labor attaché nga nakabase sa Riyadh. 

Si Atty. Fortuna nagkanayon nga nakatakda silang mo-adto sa Middle East sa umaabot Sabado, Hunyo 29 aron manguha pa og dugang testimoniya ug ebidensiya kalabot sa kaso. 

Gilauman nilang makabalik sila sa nasud sa Hulyo 13. 

Giseguro usab sa opisyal nga makakuha sila og konkretong resulta sa ilang imbestigasyon sa maong petsa. 

Kalabot niini, giingong gi-andam na sa duha ka overseas Filipino workers (OFWs) ang kasong sexual harassment nga ipasaka kang Philippine assistant labor attaché Antonio Villafuerte. 

Positibong gi-ila sa duha ka Pinay workers si Villafuerte nga giingong nang-abuso kanila samtang tua pa sila sa OFW shelters sa Saudi Arabia. 

Matud pa usab ni kanhi Labor Usec. Susan Ople, pursigido ang mga biktima nga ipadayon ang kaso batok sa opisyal aron masiguro nga dili na kini makapangbiktima pa og ubang OFWs. (PIA-Bohol/ecb) 

============

Pasidaan sa publiko: MERSCOV, mas daling makatakod ug makamatay kaysa SARS

TAGBILARAN CITY, Bohol, June 25 (PIA)--Gipa-amping ang publiko tungod kay mas daling makatakod ug mas makamatay ang bag-ong Middle East Respiratory Symptom Coronavirus (MERSCOV) kun itandi sa pareha niini nga severe acute respiratory syndrome (SARS). 

Matud pa ni Dr. Trish Perl, usa ka senior epidemiologist sa Johns Hopkins medicine, wala pa nila natumbok kun unsaon pagpasa sa sakit tungod kay anuday pipila ka positibo sa virus nga dili man unta duol sa posibleng gigikanan sa sakit. 

Sa gi-imbestigahang mga kaso sa Saudi Arabia, lapas sa gipaabot nga gidaghanon sa matakdan ang natala sa pipila ka pasyente

Apil sa mga unang findings sa grupo ang mas taas nga death rate sa MERS (65%) kun itandi sa 8% death rate sa SARS. (PIA-Bohol/ecb)