Tuesday, June 25, 2013

Mandatory health care alang sa tanang Pinoy, balaod na 

TAGBILARAN CITY, Bohol, June 24 (PIA)--Gilagdaan na ni Presidente Benigno ‘Noynoy’ Aquino III niadtong Hunyo 19 ang Republic Act 10606 o ang National Health Insurance Act of 2013.

Gimando sa maong balaod ang mandatory health care alang sa tanang Pilipino.

Ubos usab niining balaod, tubagon sa gobyerno ang premium contribution sa mga indigent ug gi-abandonang mga bata.

Gi-amyendahan niini ang kanhi Republic Act 7875 o ang National Health Insurance Act of 1995 diin nakalatid nga dili ipugos ang health insurance alang sa ubang probinsiya ug syudad. 

Sa paglagda ni Presidente Aquino sa National Health Insurance Act of 2013, naglaom si Sen. Pia Cayetano, chairperson sa Senate committee on health and demography ug sponsor sa maong balaodnon sa Senado nga matumbok ug ma-enroll na sa National Health Insurance Program ang kapin 25 milyong kabus nga Pilipino. (PIA-Bohol/ecb)

==============
Disaster preparedness program sa matag pamilya, angay repasohon

TAGBILARAN CITY, Bohol, June 24 (PIA)--Gi-aghat sa Malakanyang ang matag pamilyang Pilipino nga mohimo og ilang kaugalingong disaster preparedness plans atubangan sa gipaabot nga mga pagbaha karong panahon sa ting-ulan.

Matud pa ni Deputy Presidential Spokesperson Abigail Valte, makatabang ang pagpangandam sa matag pamilya aron malikayan ang casualties sa mga insidente sa pagbaha nga dala sa kusog nga bagyo.

Si Valte nagkanayon nga sa pagkakaron, nagpahigayon na ang National Disaster Risk Reduction and Management Council (NDRRMC) og information drives sa disaster preparedness sa family level ug gipaabot nila ang koope­rasyon sa mga pamilya niini.

Ang Department of Social Welfare and Development (DSWD), Department of the Interior and Local Government (DILG) ug ang NDRRMC nagtambayayong sa pagpangandam sa nagsingabot nga panahon sa ting-bagyo, dugang pa ni Valte.

“We appeal to families to review your families’ disaster preparedness plan. Kumpleto ba ang emergency kits sa bahay para hindi tayo nagugulat at handa tayo sa sakuna?” pahayag ni Valte diin giingong mahinungdanon nga ang matag miyembro sa pamilya kahibalo unsa ang buhaton kun adunay mga kalamidad, nag-una na niini ang pagbaton sa saktong impormasyon nga maoy makatabang sa oras sa panginahanglan. (PIA-Bohol/ecb)

===============
POEA, nipasidaan batok sa tanyag nga trabaho sa Canada

TAGBILARAN CITY, Bohol, June 24 (PIA)--Nipasidaan ang Philippine Overseas Employment Administration (POEA) sa mga Filipino household service workers (HSWs) nga nagtrabaho sa Hong Kong batok sa mga gitanyag nga pekeng trabaho sa Canada.

Matud pa ni POEA chief Hans Leo Cacdac, may 44 ka Filipino HSWs sa Hong Kong ang nabiktima na sa maong pangilad diin nagbayad pa og placement fee alang sa peke nga trabaho sa Canada.

Gitumbok ni Cacdac ang Yamsuan and Associates Overseas Employment Services Ltd./Pacific Management Services Ltd., nga giingong gidumala sa usa ka Pinoy ang nagpapaskil og pahibalo sa usa ka English nga pamantalaan sa Hong Kong aron modani og mga trabahante nga magbayad og $100 hangtud sa $300 nga placement fees alang sa giingong trabaho sa Canada apan nadiskobreng peke o “non-existent” kini.

Gitambagan ni Cacdac ang mga aplikante nga magbinantayon gayud ug tun-an og maayo ang himuong pakig-deal sa mga recruitment firms.

Pasidaan pa ni Cacdac, “Scammers with tempting job offers are out there, waiting to pound on unsuspecting applicants who are willing to part with their hard-earned money for a chance to work overseas.” (PIA-Bohol/ecb)

No comments: