PLDT nagpa-dugtong og 2 

Fiber optic cables sa Bohol 

Rey Anthony Chiu

TAGBILARAN CITY, Bohol. June 5, 2013 (PIA) – Subay sa pagpangandam sa Bohol aron mahimong duol sa damgong anaa na sa mga new wave cities alang sa Information Communication Technology, gitaho sa Philippine Long Distance Telephone (PLDT) Company Incorporated, ang padayong pagkutay sa duha ka submarine fiber optic cables paingon sa Bohol. 

Matud ni Nilo Bantilan, business head sa PLDT Visayas ug Mindanao Exchanges nga ang PLDT nagsugod na sa pagpahimutang sa duha ka fiber optic submarine cables paingon sa Bohol.

Ang fiber optic cable maoy labing bag-o nga teknolohiya nga gipasubayan sa pagpadagan sa datus sa kasayuran tungod kay kini mas taas ug bandwidth, ug mas daghan ang data nga mahimong ipasubay niini, kon itandi sa metal cables. 

Sumpay ni Bantilan, ang usa ka fiber optic cable nagagikan sa silingang lalawigan sa Sugbo paingon sa lungsod sa Clarin, samtang laing submarine fiber optic cable ang nagpaingon na sa lungsod sa Garcia Hernandez gikan sa Cagayan de Oro.

Ang pagsumpay sa Bohol sa global nga connection sa fiber optic gilauman nga matapos sa unang kwarter sa 2014, butyag ni Bantilan. 

Si Bantilan mitaho usab kabahin sa laraw sa PLDT alang sa Bohol nagdto sa mga Bol-anong stakeholders sa negosyo, local nga representante sa mga hotels, resorts, sakop sa Bohol Chamber of Commerce and Industry, tourism council, buhatan sa kagamhanan, tunghaan ug mga institusyong pribado. 

Kini usab subay usab sa halapad nga panginahanglan sa Bohol alang sa mas maayong serbisyo sa telekomunikasyon ilabi na sa panahon kanus-a nahimong mas luag ang pag-ambitay sa kasayuran pinaagi sa internet. 

Didto sa PLDT Company, Inc. Business Forum niadtong Mayo 22 didto sa Bohol Tropics, Tagbilaran City, mipadayag ang PLDT sa mga Boholano stakeholders sa mga bag-ong kalambuan sa telecommunications company alang sa Bohol.

Kahinumduman nga ang Tagbilaran bag-o lang midawat sa pasidungog isip dan-ag nga lugar alang sa sunod nga New Wave City sa Pilipinas.

Tungod usab niini, gipaseguro sa kompanya ang pagdugtong sa Bohol sa nasudnong fiber optic backbone samtang nagpanikad na ang mga mamumuhunan sa pagsugod sa negosyo dinhi. 

Gipadayag usab sa PLDT pinaagi ni Bantilan nga kaya sa kompanya sa paghatag sa labing dako nga 10 gigabytes sa internet bandwidth.

Hinuon, kini usab magdepende sa panginahanglan nga ibungat sa mga Information technology locators pohon.

============

Sa unang lima ka buwan…

4 Bol-anon namatay

Sa sakit nga dengue

TAGBILARAN CITY, Bohol, June 5, 2013 (PIA) – Gikan sa Enero hangtud sa buwan sa Mayo ning tuig, upat na ka Bol-anan nga walay palad nga nakutlo-an sa kinabuhi tungod sa pagkasakit sa dengue. 

Ang upat ka way swerte nga mga Bol-anon nagagikan sa kalungsuran sa Batuan, Clarin, Pitogo ug Tagbilaran, segun sa datus gikan sa Provincial Health Office (PHO)

Ang PHO maoy naghupot sa hiniusang mga taho sa mga tambalanan sa Bohol kalabut sa mga pasyente’ng natakboyan sa dengue. 

Gawas sa upat, laing 664 na ka Bol-anon ang nataptan sa sakit sulod sa unang lima ka buwan sa tuig, subay sa mga datus nga nakuha gikan sa Buhatan sa PHO. 

Ang Tagbilaran City, dala sa sikit na mga balay ug baga nga bul-og sa katawhan, maoy nag-una sa Bohol sa labing daghang sakit sa dengue. 

Hinuon, gibutyag usab sa taga PHO nga kini tungod usab kay nia sa syudad ang mga tambalanan, ug possible nga bisan og taga gawas sa syudad, dinhi marecord tungod kay dinhi usab magpa-confine.

Gawas sa Tagbilaran nga may 144 ka kaso sa nasakit sa dengue, taas usab ang nasakit didto sa Loon sa 102 ka pasyente.

Ang padayon nga paghasi sa dengue, o hemorrhagic fever tungod sa kinaiya ning sakit nga magdugo ang pasyente kon dili madali, usa ka timailhan nga may tataw pa nga pagkuwang sa kampanya batok sa sakit. 

Ang dengue fever, o hilanat nga dala sa lamok nga aedes aegypti, usa ka matang sa sakit nga matambalan na unta apan kinahanglang gihapon nga mahiling sa mga doctor samtang sayo pa ang pagtakboy sa hilanat. 

Gikinahanglang sayo pa matambalan na tungod kay halos lisud na ang pagpa-ayo sa sakit kon magsugod na og panggawas ang dugo, pahimangno ni Dr. Reymoses Cabagnot, PHO Bohol. 

Gitumbok usab sa mga mananambal nga kon kaniadto, mailhan ang dengue tungod sa dugay nga hilanat nga nagabalik-balik, karon, may gipakita na usab nga lahi nga timailhan ang sakit sama sa paspas nga pag-lahos ngadto sa pagdugo sa pasyente. 

Tungod usab sa kadelikado sa matang sa sakit nga makamatay, gilusad na sa Department of Health ang Aksyon Barangay Kontra Dengue (ABKD).

Uban sa mga ahensya sa kagamhanan, ang DOH nakigtambayayong sa mga komunidad aron batasanon ang limpyo nga silinganan, kay kini ang natudlo nga puy-anan sa mga lamok. 

Ang buwan sa Hunyo maoy Buwan sa Dengue Consciousness.