Taho sa nagasto sa piliay, ipasubay 

sa tukmang forma lamang-COMELEC 

Rey Anthony Chiu

TAGBILARAN CITY, Bohol, June 10, 2013 (PIA) – Kadtong mipasa na sa Statements of Election Contributions and Expenditures (SECE) apan dili subay sa tukmang porma, isipon gihapon nga wala pa makapasa. 

Kini maoy pahimangno sa Commission on Elections (COMELEC) dungan sa nagsingabot nga tagal kanus-a kinahanglang anaa na sa ahensya ang mga pagmatuod sa nagasto sa mga kandidato sa milabay nga piniliay. 

Ang panginahanglan sa pagpasa sa mga nagasto sa piniliay subay usab sa Fair Elections Law nga nagtumbok sa pila ang mahimong gastohon sa usa ka kandidato alang sa matag botante sa iyang gilansarang distrito. 

Gipasabot usab ni Atty. Leonil Marco Castillano nga ang SECE kinahanglang ipasa sa tanang kandidato nga miduso sa ilang kabubot-on nga magpapili sa milabay nga piniliay. 

Si Atty Castillano maoy election supervisor sa Bohol. 

Iya usab nga gibutyag nga adto lamang mahimong mo file sa SECE sa buhatan sa COMELEC diin ang kandidato mifile sa iyang Certificate of Candidacy.

Gani, dugang niya, walay mapili sa mga milansar, midaug, napildi man o kadtong mi-atrsa sa kandidatura, gimanduan sa balaod nga mopakita gayud sa iyang lista sa nagasto ug nadawat isip donasyon gikan sa iyang mga tigsuporta. 

Apan, gisaysay usab ang pamaagi sa pagfill-up sa SECE subay sa forma nga gipa-ambit sa COMELEC nga mao lay isipon nga tukma nga pagcomply sa balaod. 

Matud sa COMELEC, ang forma mahimong makuha pinaagi sa pag-download nga libre gikan sa website nga www.comelec.gov.ph. 

Kadtong kandidato nga midaug ug wala mosubmitir sa SECE dili makalingkod sa katungdanan, matud sa COMELEC. 

Kadtong kandidato usab nga napildi ug kadtong mi-atras saw ala pa ang piliay, kinahanglang mopasa sa SECE ka yang iyang pagpalta niini, mahimong babag sa iya unya nga pagdagan og balik sa sunod nga mga piliay. 

============

Screening sa sakit sa “kidney” 

sa Catigbian District, Hunyo 7 

Rey Anthony Chiu 

TAGBILARAN CITY, Bohol. June 10, 2013 (PIA) – Buksan didto sa Catigbian District Hospital Hunyo 7 ang screening sa 20 ka mga pasyente nga may duda nga dunay suliran sa bato o kidney. 

Duha ka simple nga test ang himoon alang niini, pasabot ni Macchiavelia Caliao, nurse ug coordinator sa Renal Disease Control Program sa Provincial Health Office (PHO) dinhi. 

Matud niya, simple nga Fasting Blood Sugar (FBS) ug urinalysis ang tanyag sa bahan nga maghimo sa pasiunang screening alang sa mga pasyente aron kahatagan og libreng konsultasyon kon mapamatud-an nga may suliran sa bato. 

Ang FBS himoon tungod kay namatikdan na nga ang usa sa mga labing sinugdanan sa sakit sa bato mao ang diabetes. Sa laing bahin, ang urinalysis maoy labing maayong test aron hibaw-an kon ang usa ka tawo may suliran sa kidney. 

Sa Catigbian, gipaabot usab nga motapnas didto sa screening ang laing mga tag 20 ka mga natudlo nga mga pasyente gikan sa mga silingang lungsod sa Catigbian Inter-local District, dugang sa tinubdan sa PHO. 

Nasayran nga naghimo na sa ilang mga kaugalingong mga screening ang mga Rural Health Units, aron ilhon kinsa kadtong ipadala ngadto sa screening sa inter-local districts, butyag ni Caliao. 

Moadto usab alang sa tungag adlaw nga screening ang mga pasyente gikan sa Corella, Sikatuna, Balilihan, Catigbian ug San Isidro. 

Alang niadtong natumbok nga mo-apil sa screening, kinahanglang mag-puasa una sa pamahaw nianang adlawa, samtang wala pa mapailawom sa FBS, tambag sa mga tinugyanan nga maghimo sa test. 

Kini usab samtang nahimo na ang susamang screening didto sa President Garcia Memorial Provincial Hospital sa Talibon niadtong Hunyo 6 gikan sa alas 8:00-12:00 sa udto. 

Didto usab mitapnas ang mga pasyente nga una na nga na-screen gikan sa Buenavista, Getafe, Talibon, Trinidad, San Miguel, Ubay, Bien Unido ug President Carlos P. Garcia o Pitogo. 

Kini usa dugang pang mga screenings alang sa kidney lakip sa mga kalihukan nga natumbok alang usa ka dako nga medical outreach program sa National Kidney Transplant Institute (NKTI) ug sa Department of Health uban sa Provincial Government subay sa paghandum sa National kidney Disease Prevention Month sa buwan sa Hunyo.