TESDA: Job mismatch, hinungdan sa pagsaka sa unemployment rate 

TAGBILARAN CITY, Bohol, June 13 (PIA)--Gibutyag ni Technical Education and Skills Development Authority (TESDA) Director General Joel Villanueva nga job mismatch ang hinungdan sa pagsaka sa gidaghanon sa mga Pinoy nga walay trabaho.

Sa datos sa gobyerno, mikabat na sa 7.5% ang unemployment rate niadtong Abril gikan sa 7.1% niadtong Enero.

Matud pa ni Villanueva, misaka ang gidaghanon sa mga walay trabaho tungod kay dili tukma ang mga kurso sa mga nakatapos sa mga trabahong kinahanglan sa industriya. Gawas pa nga pilian ang ubang bag-ong graduate sa mga gustong sudlan nga trabaho.

Giingong wala usab pahimosli sa mga Pinoy ang mga nagbukas nga oportunidad sa nasud.

Aron masulbad ang problema sa job mismatch, aktibo nang nakigtambayayong ang gobyerno sa mga naa sa industriya aron mahibaw-an ang mga trabahong kinahanglan niini.

Gi-review na usab sa gobyerno karon ang Philippine Qualifications Framework samtang nagpahigayon na og mas halapad nga pagtuon ang ubang ahensya sa gobyerno aron mapahimutang ang curriculum sa tanang level gikan sa Department of Education (DepEd), Commission on Higher Education (CHED) ug TESDA alang sa mga kursong angay kuhaon aron malikayan ang job mismatch.

Gibutyag ni Villanueva nga daku pa gihapon ang panginahanglan sa sektor sa business process outsourcing (BPO) nga mokabat na sa kapin 150,000 ka trabaho ang gikinahanglan.

Gawas sa BPO, kusog usab ang panginahanglan sa sektor sa turismo, animation, construction, welders ug machinist. (PIA-Bohol/ecb)