Thursday, November 23, 2017

19 banay'ng Marawi uli na, 
77 banay, ania pa sa Bohol

TAGBILARAN CITY, November 22 (PIA)--Nakapa-uli na ang 19 ka banay nga taga Marawi samtang may 77 pa ka banay nga Muslim nga temporaryong milikay sa panagbagat sa Mindanao ang ania pa nagpabilin sa Bohol. 

Kini maoy napadayag sa Buhatan sa Provincial Social Welfare and Development Office pinaagi ni Social Worker Hanna Mae Lubiano didto sa Provincial Peace and Order Council Meeting ning bag-o lamang. 

Segun sa susamang taho, ang desisyon sa 19 ka banay nga mopauli sa Marawi nahitabo human madeklara sa kagamhanan nga luwas na ang syudad sa kagubot human gihasi sa mga rebeldeng Muslim nga mipaila nga sakop sa Islamci State of Iraq and Syria. 

Sa kinatibuk-an, mikabat sa 103 ka banay ang nahidangat sa Bohol atul sa kaguliyang sa Marawi ug namatikdan nga 29 ka banay niini didto temporaryong nanimuyo sa Muslim Village sa taloto samtang laing 29 ka banay ang nitapnas sa Muslim Village sa Poblacion 1. 

Laing 9 ka banay didto mipuyo sa Muslim Village sa Jagna samtang may 8 pa ka banay nga temporaryong mipuyo sa Muslim Village sa Ubay ug laing duha ka banay ang naa sa Dauis. 

Gitaho usab sa OPSWD pinaag ni Lubiano, kinsa hepe sa Emergency Division sa buhatan nga mihatag ang kagamhanan pinaagi sa ilang buhatan sa hinabang agi og plete sa 19 ka banay nga mipauli. 

Mikabat sa 66,750.00 ang gitabang nagdto sa 19 ka banay nga may 68 ka tawo nga mipauli na aron ikauban ang ilang mga banay nga gibiyaan didto human miulbo ang guerra. 

Sa mga nahibiling Muslim, migasto usab ang kagamhanan sa P19,300.00 agi og tabang medikal sa 9 ka mga evacuees nga nagkaproblema sa sakit, 4,000 agig hinabang pagpalubong sa duha ka evacuees nga namatay dala sa sakit ug mihatag pag duha ka wheelchair alang sa duha ka pasyente nga Muslim. 

Samtang ania dinhi ang mga milikay sa kagubot didto, nahiusa usab ang mga Bol-anon sa pagtabang. 

Gawas sa tabang pinansyal nga gitunol gayud sa mga representante sa nagdto sa mga tinugyanan sa Marawi, duha ka Community extension programs sa University of Bohol ug Holy Name University ang mihatag og stress debriefings ug mitunol sa mga groceries sa mga biktimas kagubot. 

Nagpundo usab ang mga kapolisan sa tibuok Bohol sa paghatag sa mga pagkaon sama sa bugas, de-lata, noodles, biscuits, gatas, kape ug mga kagamitan sama sa shampoo, toothpaste, sabon kaligo, sabon panglaba, sanitary napkins ug baby diapers. 

Mitaho usab ang OPSWD nga mihatag usab silag pagkaon sama sa bugas og delata lakip na ang mga habol, moskitero, malong, tawas, tsinelas sa mga bata ug sinena sa mga bata agig tabang sa mga evacuees. 

Hinuon wala mataho kon ang nahimiling mga banay, permanente na ba lang gayud nga mamuyo sa Bohol o may laraw pang mouli sa napalingkawas na nga syudad. (rahc/PIA-7/Bohol)
Pipila sa mga taga Marawi nga namalhin dinhi sa Bohol paglikay sa kaguliyang ang nanguli na, apan may 77 pa ka banay nga nagpadayong nia pa sa Bohol, segun sa OPSWDO. (PIA/OPSWD)

No comments: