Wednesday, November 22, 2017

Aplikasyon alang sa Civil 
Service exam, gibuksan na 

TAGBILARAN CITY, Nov. 17 (PIA)--Gipahibalo sa Civil Service Commission (CSC) nga nagsugod na sila kagahapon, Nobyembre 16 sa pagpangdawat og aplikasyon alang sa Career Service Examination (CSE) sa mga Professional ug Sub Professional levels.

Matud pa sa Information Officer sa CSC-Bohol Filed Office nga si Liezl Del Rosario, gitakda ang pasulit sa Marso 18, 2018.

Atol sa binuwang tigom sa mga miyembro sa Association of United Development Information Officers in Bohol (AUDIO-Bohol) kagahapon didto sa JJ’s Seafood Village, gibutyag ni Del Rosario nga taman lamang sa Enero 31, 2018 ang ilang pagpangdawat og aplikasyon alang sa maong pasulit.

Mahimong moadto sa mga CSC Regional Office (CSCRO) o mga CSC Field Office (CSCFO) ang mga interesadong mag-file og aplikasyon ug mahimo usab mobisita sa ilang CSC website nga www.csc.gov.ph alang sa listahan sa requirements.

Gitambagan ni Del Rosario ang mga interesadong mo-apply nga himuon kini nila dayon tungod kay bisan sa Enero 31, 2018 pa ang gitakdang katapusang pagpangdawat og aplikasyon, nagpatuman man ang mga CSCRO ug CSCFO og first-come, first-served basis. 

Kini nagpasabot nga mahimong tapuson na ang pagpangdawat og aplikasyon kun makab-ot na ang gidaghanong aplikante sa target number.

Ang CSE requirement alang sa mga Pilipinong gustong mo-trabaho sa gobyerno, ug bukas kini sa tanan nga may edad 18 pataas. (ecb/PIA7-Bohol)

===============
Pakig-partner sa FB sa PCOO, DICT ug BCDA 
magpa-paspas sa internet service sa nasod

TAGBILARAN CITY, Nov. 17 (PIA)--Makapaabot ang publiko nga mapa-paspas na ang internet service sa tibuok nasod sa umaabot nga panahon.

Kini human sa gilagdaang partnership sa Presidential Communications Operations Office (PCOO), Department of Information and Communications Technology (DICT) ug sa Bases Conversion and Development Authority (BCDA) kauban ang Facebook kalabot sa Strategic Engagement and Collaboration to Undertake a Reliable and Efficient Government Internet o SECURE GovNet.

Matud pa ni PCOO Kalihim Martin Andanar, maghimo og ultra high speed information highway ang SECURE GovNet nga maoy magpa-paspas, magpakunhod sa bayranan ug mas mahimong accessible ang broadband internet sa tibuok nasod.

Gidugang pa ni Andanar nga mahimong dalan kining proyekto sa implementasyon sa National Broadband Plan, free public WiFi program ug uban pang ICT projects sa DICT.

Gitataw pa sa Kalihim nga ubos sa E-government Master Plan, tarungon usab sa SECURE GovNet ang paghatag og mas epesyenteng serbisyo sa gobyerno tungod kay interconnected na ang mga ahensya sa gobyerno. (ecb/PIA7-Bohol)

No comments: