ASEAN nations, misaad nga 

magtinabangay batok sa terorismo

MANILA, Nov. 15 (PIA)--Nipatigbabaw ang paghisgot kalabot sa terorismo sa 31st Association of Southeast Asian Nations (ASEAN) Summit and Related Summits. 

Gikumpirmar ni Presidente Rodrigo Duterte nga katunga sa mga interventions sa mga gipahigayong ASEAN Summit and Related Meetings naghisgot kalabot sa terorismo.

Sa press briefing human sa closing ceremony sa ASEAN Summit, gibutyag sa Presidente nga tanan nipahayag og kahadlok sa pagkamatay sa mga tawo sa kalit nga pagbuto sa bomba.

Giingong misaad ang mga lider sa 10-member regional bloc ug dialogue partners niini apil na ang China ug United States nga magtinabangay sila sa pagsumpo sa nagkalain-laing terror groups. 

Gibutyag ni Duterte nga nauyonan na usab ang pagpakusog sa depensa sa nasod apan nagdumili kini sa pag-detalye niini. 

Kalabot niini, giingong gipaabot sa mga world leaders ang ilang pag-ila sa kabayanihan ug kaisog sa mga polis ug sundalong nakig-giyera sa ISIS-Maute terror group sa Marawi City.

Kahinumdoman nga niabot sa halos lima ka buwan ang giyera sa syudad sa Marawi nga nakapatay sa mga sibilyan, terorista ug bisan pipila ka pwersa sa gobyerno. (ecb/PIA7-Bohol)

===============

SSS loans ug uban pang benepisyo, mahimo 

nang i-withdraw gamit ang UMID-ATM card

TAGBILARAN CITY, Nov. 15 (PIA)--Mahimo nang magamit sa mga miyembro sa Social Security System (SSS) ang ilang Unified Multi-purpose Identification cards (UMID) sa pag-withdraw sa ilang mga loans ug uban pang benepisyo sa mga Automated Teller Machines (ATM).

Matud pa ni SSS President and Chief Executive Officer Emmanuel Dooc, pinaagi niining programa, mapadali ang disbursement sa mga benepisyo sa mga miyembro sama sa disability; retirement; sickness ug maternity claims; ug member privileges sama sa salary ug calamity loans.

Giingong mahimong luwas na ang pagbalhin sa pondo ug mapadali na usab ang pagproseso.

Matud pa nga sulod lamang sa 24 oras human maaprobahan ang loan, mahimo na kining i-withdraw sa usa ka miyembro.

Sa kasamtangan, may upat ka bangko na ang nisugot nga ipatuman ang UMID-ATM project apil na ang Unionbank nga una nang nagsugod niining proyekto.

Matud pa sa buhatan nga sa pagkakaron, may 34,000 ka miyembro sa SSS ang naggunit na karon og Unionbank of the Philippines ATM-enabled UMID card. (ecb/PIA7-Bohol)