DEPED mihangyo sa DOST

lupkon ang Bohol og kiosks

TAGBILARAN CITY, November 15, 2017 (PIA)--Gihangyo sa Bohol Division Superintendent sa Department of Education (DepED) ang Department of Science and Technology (DOST) Science and Technology Information Institute (STII) sa paghatag og prayoridad sa Bohol sa dugang pang digital science library. 

Didto atul sa dinungan nga pagtugyan sa 59 ka mga Science and Technology Academic and Research-based Openly Operated Kiosk Station (STARBOOKS) didto sa Reynas Haven and Gardens Nobyembre 15, gipatiaw-tiaw ni Dr. Wilfreda Bongalos og hangyo ang DOST nga unahon na lang una ang mga pangpublikong tunghaan sa Bohol sa paglukop sa digital science library in a kiosk. 

Kini human gibutyag ni DOST STII Executive Director Richard Burgos nga tumong nila sa kagamhanan nga lukpon og hatag og mga offline science and technology academic research stations ang mga tunghaan sa nasud. 

Ang STARBOOKS, matud pa ni Director Burgos, maoy tubag sa kagamhanan sa kamatuoran nga 1% lamang sa mga library sa mga pangpublikong tunghaan ang functional. 

Gani, dugang ni Director Burgos nga 24% ra sa mga tunghaan ang nakasumpay na sa information superhighway nga gitanyag sa internet. 

Ang STARBOOKS usa ka offline access sa mga kabataang naa sa pangpublikong tunghaan nga libre, pasabut ni Director Burgos, kinsa natawo sa Negros ug makasulti usab og binisaya. 

Makuha sa Starbooks ang mga educational videos alang sa mga magtutunghans a science ug technology, documentary videos, supplementary reading materials nga may kalambigitan sa science ug technology, ug bisan unsa nga may kalabut sa siyensya, dugang sa DOST. 

Matud ni Superintendent Dr. Bongalos, ang 59 ka mga Starbooks kiosks nga gihatag alang sa mga pangpublikong tunghaan sa Bohol, naa ra sa 5% sa kinatibuk-ang tunghaan sa mga kabarangayan, mao nga mas maayo og malukop. 

Sa pagtugyan usab sa mga kiosks, gipadayag sa kagamhanan nga ang pasilidad maoy gasa sa kagamhanan sa mga millennials nga uhaw sa kasayuran ilabi na niining panahon nga may nikatap usab nga mga mini nga mga balita. 

Gani, mihangyo ang DOST nga unta dili lang tabunan ang mga kiosks og sigurohon nga magamit sa mga kabataan kay maoy tumong niini. 

May mga STARBOOKS kiosks nga naabtan sa DOST nga wala ipagamit sa mga kabataan tungod sa kahadlok nga maguba, matud pa. (rahc/PIA-7/Bohol)

Malipayon nga gidawat ni DEPED Superintendent Wilfreda Bongalos ang 59 ka digital science libraries nga naa sa usa ka kiosk nga magamit sa mga kabataan sa ilang pag-ugmad sa impormasyon kabahin sa siyensya ug matematika didto sa Reynas Garden. (rahc/PIA-7/Bohol)