DepEd, nipasidaan sa pekeng class suspension;

mi-klaro nga may klase sa Nob. 23, 24 ug 27

TAGBILARAN CITY, Nov. 21 (PIA)--Nipasidaan ang Department of Education sa mga netizens nga dili motuo dayon sa mga social media pages nga nagpakatap sa mga announcement kalabot sa suspensiyon sa mga klase.

Kini human i-post sa page nga may pangalan nga "Walang Pasok Advisory" nga giingong suspendido ang klase sa umaabot nga tulo ka adlaw karong buwan sa Nobyembre.

Sa gipagawas nga press release sa DepEd, gi-klaro niini nga may klase ang mga estudyante sa November 23, 24 ug 27, sukwahi sa gi-post sa maong social media page.

Nipahayag ang buhatan nga wala sila’y kalabotan sa "Walang Pasok Advisory" Facebook page.

Samtang gitambagan sa DepEd ang mga netizens nga bisitahon ang ilang website ug official social media accounts aron matino ang mga announcements kalabot sa mga suspensiyon sa klase sa mga tunghaan.

“The Department further advises the public to get verified information and announcements of the agency on the official website, www.deped.gov.ph, official Facebook page DepEd Philippines, and official Twitter account DepEd_PH,” matud pa sa DepEd. (ecb/PIA7-Bohol)

==============

3 ka weather system, magpa-ulan 

sa nagkalain-laing dapit sa nasod

TAGBILARAN CITY, Nov. 21 (PIA)--Bisan walay bagyo o Low Pressure Area (LPA) sa sulod sa Philippine Area of Responsibility (PAR), tulo ka weather system ang gibantayan karon sa Philippine Atmospheric, Geophysical and Astronomical Services Administration (PAGASA).

Matud pa sa PAGASA, tail-end of cold front ang nakaapekto karon sa sidlakang bahin sa Northern ug Central Luzon diin magdala kini og katag-katag nga pag-ulan ug dugdog o thunderstorms sa mga lalawigan sa Cagayan, Isabela, Aurora ug Quezon.

Giingong Northeast Monsoon usab ang nasinati karon sa Northern Luzon nga maghatod og isolated ug hinay nga pag-ulan sa Batanes ug Babuyan Islands.

Samtang extension sa LPA nga naa sa gawas sa nasod ang maghatod og hinay ngadto sa kasarangan ug panagsang kusog nga pagbundak sa ulan sa tibuok Mindanao. 

Gibutyag sa PAGASA nga posibleng mosulod sa PAR ang gibantayang LPA nga naa sa gawas sa nasod karon.

Matud pa ni PAGASA weather forecaster Lorie Dela Cruz, sa mosunod nga 24 hangtod 48 oras mahimong mosulod sa nasod ang maong LPA.

Sa higayong mahimo kining bagyo samtang naa sa sulod sa nasod, hinganlan kini og “Urduja”. (ecb/PIA7-Bohol)