DOH, nipasidaan sa publiko batok sa pag-inom 

og antibiotics nga walay reseta sa doktor

MANILA, Nov. 28 (PIA)--Nipasidaan ang Department of Health (DOH) sa publiko batok sa pag self-medication ug pag-inom og mga antibiotics nga walay reseta gikan sa doktor.

Agi kini og pagsunod sa gilagdaang kasabotan sa Pilipinas sa Anti-Microbal Resistance (AMR) sa bag-o pa lamang gipahigayon nga 31st Association of Southeast Asian Nations (ASEAN) Summit sa nasod.

Gibutyag ni DOH Kalihim Francisco Duque III nga ilang gilusad ang National Antibiotic Guidelines aron maghatag og dugang kaalam sa paggamit o pag-inom og mga antibiotic.

Nipasidaan pa si Duque nga may dakong implikasyon sa kahimtang ug kahimsog sa usa ka may sakit ang basta na lang pag-inom og antibiotics nga walay reseta gikan sa mga doctor. 

Gipasabot sa kalihim nga magbaton usab og antibiotic resistance o mawad-an og epekto ang antibiotic batok sa mga mikrobyo sa lawas sa pagpataka og pag-inom niini mao nga angay sundon lamang ang saktong reseta sa doktor. 

Sa pagkakaron, naghimo na og lakang ang DOH aron iduso ang National Antibiotic Guidelines.

Kalabot niini, gitataw ni Duque nga kinahanglang siguraduhon sa gobyerno, ilabi na ang mga buhatan sa panglawas sa mga sakop sa ASEAN nga dili basta-basta gamiton ang antibiotic.

Sa gipahigayong ASEAN Summit sa nasod sa niaging semana, gilagdaan sa mga miyembrong nasod ang usa ka deklarasyon sa pagbatok sa AMR. (ecb/PIA7-Bohol)

===============

DOLE, nagpagawas og pay 

rules alang sa Bonifacio Day

TAGBILARAN CITY, Nov. 28 (PIA)--Subling gipahinumdoman sa Department of Labor and Employment (DOLE) ang mga employer sa pribadong sektor nga sundan ang saktong sumbanan sa suholan alang sa Nobyembre 30, Adlaw ni Bonifacio, nga usa ka regular holiday.

Sa gipagawas nga Labor Advisory No. 10, series of 2017 isip pagsunod sa Proclamation No. 269 ni Presidente Rodrigo Duterte, gi-deklarang regular holiday ang Nobyembre 30 isip pagtimaan sa adlaw’ng natawhan sa bayaning si Andres Bonifacio.

Kalabot niini, gitakda sa DOLE nga ipatuman sa mga employer ang mga mosunod nga sumbanan sa suholan alang sa Nobyembre 30:

Kun ang empleyado dili mo-trabaho, bayran pa gihapon siya og 100 porsiyento sa iyang sweldo alang sa usa ka adlaw, apil na usab sa iyang Cost of Living Allowance [(Inadlaw nga suholan + COLA)] x 100%];

Kun mosulod ang empleyado sa trabaho, bayran siya og 200 porsiyento sa iyang sweldo alang sa usa ka adlaw alang sa unang walo ka oras nga pag-trabaho, apil na sa iyang COLA [(Inadlaw nga suholan + COLA) x 200%].

Apan kun ang empleyado ni-trabaho og lapas sa walo ka oras, bayran siya og dugang 30 porsiyento sa iyang inoras nga rate (Hourly rate sa inadlaw nga sweldo x 200% x 130% x pila ka oras nga pag-trabaho).

Ug kun ang empleyado ni-trabaho ug natunong nga ang maong adlaw mao ang iyang day-off o rest day, makadawat siya og dugang 30 porsiyento sa iyang daily rate ug 200 porsiyento sa iyang inadlaw nga sweldo [(Inadlaw nga sweldo + COLA) x 200%] + [30% (Inadlaw nga suholan x 200%)];

Apan kun matunong nga day-off sa empleyado ug mo-trabaho siya og overtime, makadawat siya og dugang 30 porsiyento sa iyang hourly rate alang sa maong adlaw (Hourly rate sa inadlaw nga sweldo x 200% x 130% x 130% pila ka oras nga pag-trabaho). (ecb/PIA7-Bohol)