Magsayo batok Hayashi:

Dili magsayo'g sulti, apan 

tumbahon kon makalugar

TAGBILARAN CITY, November 23 (PIA)--Dili mag-una-una apan kon mopakita ang oportunidad nga tumbahon og sayo ang kontra, dili kini niya palabyon. 

Kini ang gibutyag sa Bol-anong boksidor nga si Mark "Magnifico" Magsayo, kinsa kasagaran sa iyang away, dili gayud magdugay. 

Si Magsayo nga mohimo sa labing unang higayon nga siya ang mainfight, mopakita sa iyang katakus ibabaw sa luna batok sa beteranong boksidor nga Hapon nga si Syota Hayashi sa "Battle in Bohol," Pinoy Pride 43 karong Sabado, Nobyembre 23, 2017 didto sa Bohol Wisdom School Gymnasium. 

Kahinumduman nga niadtong Hulyo 2014, miaway si Magsayo dinhi sa Tagbilaran isip undercard ug kanus-a iyang gipalukapa si Ernesto Fontanilla. 

Si Magsayo, nga gipanganak sa Tacloban apan gipadako sa Tagbilaran, naghupot sa fight record nga 17 ka daug, 13 niini pinaagi sa pagknock-out sa kontra, walay tabla ug walay pilde, makigharung ni Hayashi, usa ka beteranong Hapon nga may fight record nga 30 ka daug, 16 niini pinaagi sa knock-out, 6 ka pilde ug usa ka tabla. 

Giisip nga labing dan-ag nga paglaum sa mga boksidor nga Pinoy karon, si Magsayo maoy naghupot sa bakus sa Borld Boxing Organization International Featherweight Champion, human sa iyang propesyonal nga away nga kasagaran dili na maabtan pa sa lahutay. 

Dala ang kompyansa nga 75% nga knock-out power, si Magsayo kasamtangang ika duha sa WBO Featherweight Division human ni WBO No. 1 Jojo Diaz (California) nga may boxing record nga 25 ka daug, walay pilde ug walay tabla nga karon nakapila aron mohagit sa Division Champion. 

Ang division champion niini nga timbang mao si Oscar Valdez (Mexico) kinsa wa pay pilde sa 23 ka daug ug 19 niini pinaagi sa knock-out. 

Sa laing bahin, si Hayashi, kanhi Japanese featherweight champion, mipalup-og kang Pinoy boxer nga taga General Santos nga si Mark Salvania sa ila upat nga hugna sa ilang away. 

Si Hayashi, kinsa motala sa iyang labing una nga international nga away gawas sa iyang nasud, una na nga namahayag nga kon mapildi ning awaya, moretiro na sa iyang pagkaboksidor. 

Matud sa kampo ni Hayashi, nga ilang paningkamutan nga ganoyon ang away samtang nagtuo sila nga si Magsayo dili moharung sa lahutay. 

Hinuon, misalig si Edmund Villamor, trainor ni Magsayo nga ila na nga gipangandaman ang posibilidad nga molahutay gayud nagdto sa 12 ka hugna. 

"Modaug man o mapildi, kinahanglang makapatumba gyud," kini usab ang tumong sa kampo ni Hayashi ng gibungat sa ilang trainor nga si Kiyoshi Katanaka.

Apan gipasalig ni Magsayo, malingaw gyud ang mga Bol-anon pohon.

Ang Battle in Bohol Pinoy Pride 43 gitanyag sa ALA Promotions ug sa City Government of Tagbilaran pinaagi ni Mayor John Geesnell Yap II. (rahc/PIA-7/Bohol)

Mipasalig silang WBO International Chairman Leon Panoncilio, City Mayor John Geesnell Yap II (ikatulo) ug ALA Boxing Promotions CEO nga si Michael Aldegeur (daplin nga-shades) nga ang away nila Mark "Magnifico" Magsayo (bol-anon) ug Syota Hayashi (Hapones) makalingaw sa tanan. Ang away adto mahitabo sa Bohol Wisdon School Gym, sa Sabado, Nobyembre 25. (rahc.PIA-7/Bohol)