Friday, November 24, 2017

Mayor Yap makigsabut nga
buksa'g balik ang ALA gym

TAGBILARAN CITY, November 23 (PIA)--Kon dili magkaproblema, suwayan ni Tagbilaran City Mayor John Geesnell Yap II sa pagkombinsi ang ALA promotions nga buksan og balik ang gibiyaan nga gym sa Taloto. 

Kini maoy gibungat ni Mayor Yap, kinsa maoy nanguna sa syudad sa paghulma sa iyang mga batan-on aron mamahimong world class nga atleta. 

May lig-on ug kasaligan man nga grassroots program alang sa pa-ugnat sa kusog, ang Team Tagbilaran City nga karon nahimo nang kadalokang bahan sa mga rehiyonal nga bangga sa paugnat sa kusog, wala pa gihapo'y training center sa sports ilabi na sa boksing. 

Samtang wala pa pormal nga ikabungat ngadto sa mga tag-iya sa gym nga temporaryong gisirad-an human gihiklin sa ALA promotions ang sentro sa ilang bansaybansay sa pagka boksidor didto sa Sugbo, masaligon si Mayor Yap nga iyang ika-estorya ang mga Aldegeur. 

Si Micahel Aldeguer, kinsa suod nga higala ni Yap, mipkompirma usab nga sila ang tag-iya sa luna nga gitukoran sa gym nga maoy unang nasudlan sa boksidor nga si Mark "Magnifico" Magsayo. 

Si Magsayo maoy labing tataw nga Pinoy nga mmay labing dakong kahigayunan nga mamahimong world champion, ug maghimo sa iyang title defense dinhi sa Tagbilaran sa Nobyembre 25, adto sa Bohol Wisdom Gymnasium sa may alas 6:00 sa gabii. 

Si Magsayo ang naghupot sa bakus isip World Boxing Organization International Featherweight Champion nga buot ilogon sa usa ka beteranong Hapon nga boksidor nga si Syota Hiyashi. 

Sa wala pa magpalig-on si Magsaya aron makab-ot ang 18 ka daug, walay pildi og walay tabla, dinhi siya nagsugod sa iyang bansaybansay human niya hikaplagi ang gym sa tantong pagsuroy og ice-cream. 

Dinhi usab sa susamang gym nakahimog pipila ka bansay ang mga Bol-anong boksidor nga sila Rey "Boomboom" Bautista, Cesar "Czar" Amonsot, Aj "Bazooka" Banal, kinsa may mga mabulokong mga kinabuhi isip mga lig-ong kontra sa nagkadaiyang timbang. 

Kon kabuksan og usab, dili lang paghatag og pagtamud sa mapaubsanong sinugdanan ni Magsayo ang ika saulog sa syudad, kini usab magbuhi sa himaya nga nakab-ot sa mga Bol-anong boksidor ug mga kampeyon sama nila ni Nonito Donaire, ug sa Olympian nga Jagnaanon nga si Roberto Jalnaiz. (rahc/PIA-7/Bohol) 
Suntok sa buwan ba kaha ang laraw ni Mayor Baba Yap nga buksan og balik ang gibiyaan na nga ALA Promotions Gym sa Taloto? Kini matubag human formal nga ika-estorya sa mayor ang iyang higala nga si Michael Aldegeur CEO sa ALA sa dili madugay. (rahc/PIA-7/Bohol) 

No comments: