Mga kumpanyang nagbayad og revolutionary tax 

sa NPA, gipasidan-ang ipasarado ni Duterte

MANILA, Nov. 22 (PIA)--Gipasidan-an ni Presidente Rodrigo Duterte ang mga kumpanyang padayon nga nagbayad og ‘revolutionary tax’ sa New People’s Army (NPA) nga ihunong na ang paghatag niini og suporta sa rebeldeng grupo.

Gihimo kini ni Presidente Duterte sa okasyong “Ang Huling Tikas Pahinga” isip paghatag og saludo sa mga Bayani sa Marawi nga gipahigayon sa syudad sa Taguig kagahapon.

Matud pa sa presidente, karong padayong giputol na sa gobyerno ang kasiglabotan sa NPA ug sa ilang liderato, angay na usab ihunong sa mga kumpanya ang paghatag og salapi sa maong grupo.

Giingong sa higayon nga ipatuman ang all-out operations batok sa mga komunista, maglusad usab sila og crackdown sa mga nagpondo sa gikonsiderar nga teroristang grupo.

Ug kun giingong padayon nga maghatag og revolutionary tax ang mga negosyante ug kumpanya, ipasarada niya kini dayon.

Gipananglit pa sa Presidente ang mga mining companies nga naghatagan og revolutionary tax sa NPA aron dili samokon sa mga rebelde sa ilang pagmina sa mga kabukiran. (ecb/PIA7-Bohol)

==============

Labor inspections sa mga business

establishment, suspensohon una sa DOLE

TAGBILARAN CITY, Nov. 22 (PIA)--Aron malikayan ang posibleng pagpanuhol sa ilang mga kawani, nadesisyonan sa Department of Labor and Employment (DOLE) nga magpatuman og suspensiyon sa pagpahigayon og labor inspection karong panahon sa Pasko.

Gibutyag ni Labor Undersecretary Joel Maglungsod nga sugod sa Disyembre 8 hangtod sa Enero 7, 2018, dili una magpahigayon ang ilang buhatan og labor inspection.

Gipasabot ni Maglungsod nga bisan walay intensyong modawat og regalo ang ilang mga kawani, mahimo man silang masuholan ug kini ang ilang gilikayan.

Sa pagpahigayon og labor inspection, ginasusi sa mga labor law compliance officer ang mga kumpanya ug tinuon ang ilang mga posibleng paglapas sa labor rights ug regulations, kauban na ang occupational health standards, non-payment of salaries ug kun gipatuman pa ang kontraktuwalisasyon.

Apan giseguro sa DOLE nga padayon silang modawat og mga reklamo ug mahimo pa gihapong motawag kanila ang mga empleyado kun may gusto silang isumbong sa dili maayong kondisyon nila sa trabaho.

Kun may madawat nga reklamo, gipasalig ni Maglungsod nga aksyonan kini dayon sa DOLE bisan gipatuman ang suspensiyon sa labor inspection.

Kini tungod kay giingong mahimo man silang magmando sa pagpahigayon og special inspection. (ecb/PIA7-Bohol)