Friday, November 10, 2017

Mindanao Freedom Ride 2017
modangat sa Bohol Nob 10-11

TAGBILARAN CITY, November 9, 2017 (PIA)--Human miabi-abi sa mga karaang saykanan nga gimintinar ug gipadagan pa gihapon sa mga tigkolekta niini, ang mga nindot ug hamis nga kadalanan sa Bohol modawat na usab sa lain nga mga matang sa sakyanan: mga dagkong motorsiklo.

Kapin kon kulang 50 ka tigmotor nga nagagikan sa nagkadaiyang dapit sa Mindanao nga mihimo na usab sa ika unom nga Mindanao Freedom Ride sa 2017 (MFR 2017) ang mahidangat dinhi sa Bohol ugma.

Kini subay sa ilang tinuig nga byahe kampanya alang sa luwas ug linaw nga Mindanao ug nasud, matud sa ilang lokal nga guide nga si Jude Ybas.

Sa tumoy sa ilang taas nga panaw nga nagdala kanila sa lima ka lalawigan sa Kabisay-an, mahidangat dinhi agi sa Ubay ang mga motorista nga miuban sa 7 ka adlaw nga nga kampanya aron usab pagpagawas sa mensahe nga dili lamang kagubot ug kaguliyang ang naa sa Mindanao.

Una na nga nangaghat ang mga motorista sa Mindanao ngadto sa mga motorista sa tibuok nasud nga suroyon ang isla sa Mindanao aron pamatud-an nga dako pa ang lugar didto nag way kagubot ug luwas.

Gani, ang MFR 2017 usa na ka pamaagi sa pagpagawas sa mensahe nga walay kuyaw ang pagbyahe sa Mindanao ug sa tibuok nasud, segun pa sa mga tigpasiugda sa byahe.

Dugang pa, ang byahe usa ka pamaagi sa pagpamatuod nga pwede ang motorcycle tourism sa Bohol samatang suwayan sa mga motorista ang kahimtang sa kadalanan, mga panakyanan sama sa ferry boats, mga hotels ug resorts ug ang mga pasilidad pangturismo dinhi.

Sa ilang ika lima ka adlaw human malibot ang Southern, ug Northern Leyte ug ang Samar, Eastern Samar ug Northern Samar, mo-abut dinhi sa Bohol and MFR 2017 Nobyembre 10 sa ala 1:00 PM og molahos sa Alicia, Carmen, Balilihan, Corella, Dauis ngadto sa Dumalu-an human hunongan ang mga tourist spots.

Sa Nobyembre 11, gikan sa Dumalu-an, mohimo ang mga motor riders sa gikahinaman nga countryside tour sa dili pa sila mobyahe uli sa Mindanao.

Sa ika 12, molarga ang grupo sa mga motorista paingon sa Anda, sa dili pa mobalik paingon sa Jagna aron ikasakay na balik sa Mindanao. (rahc/PIA-7/Bohol)

No comments: