Online bidding process, gisugdan

na sa mga proyekto sa DOTr

TAGBILARAN CITY, Nov. 20 (PIA)--Ipatuman na sa Department of Transportation (DOTr) ang automated procurement process alang sa tanang bidding sa mga proyekto sa buhatan.

Matud pa ni DOTr Kalihim Arthur Tugade nga tuyo niining mahimong transparent ug malikayan ang palakasan sa pagkuha og mga proyekto sa ilang buhatan.

Giingong mas mahimong paspas na usab ang tanang proseso ilabi na sa bidding alang sa mga proyekto sa DOTr.

Apan nakalatid sa DOTr Order Number 2017-017 nga sakop lang niini ang mga bag-ong proyekto ug dili ang mga negotiated contract nga mo-agi pa gihapon sa manual process.

Gipasabot pa ni Tugade nga maghimo og usa ka official email account ang Bids and Awards Committee aron didto ipaagi ang tanang mga transaksiyon nga may kalabotan sa ilang mga bag-ong proyekto.

Tanang mga negosasyon, kontrata, mga dokumento apil ang mga notices mo-agi sa automated process sa DOTr. (ecb/PIA7-Bohol)

===============

Bag-ong sumbanan alang sa sak-

tong paggunit sa LPG, gimugna

TAGBILARAN CITY, Nov. 20 (PIA)--Gitahasan sa Department of Energy (DOE) ang Oil Industry Management Bureau sa pagmugna og sumbanan alang sa mga refilling stations sa Liquified Petroleum Gas (LPG).

Kini atubangan sa mga natalang aksidente sa mga LPG refilling stations nga nageresulta sa pagkamatay sa pipila ka indibidwal.

Tuyo niining giyahan ang mga opisyal apil na usab ang mga trabahante sa mga refilling stations kalabot sa sakto, luwas ug episyenteng pag-refill sa mga tangke sa LPG.

Nakalatid sa maong sumbanan ang saktong paagi sa pagkarga ug pagkanaog sa mga tangke gikan sa truck paingon sa refilling area, saktong pagsusi sa kalidad sa mga tangke ug ang saktong pag-stock niini.

Gimanduan usab ang mga LPG refilling stations sa pagpahigayon og regular nga fire drill apil na ang pagbutang og fire marshal sa ilang mga istasyon aron masiguro nga luwas nga makagawas ang mga kauban niini sa panahon kun adunay emergency. (ecb/PIA7-Bohol)