Wednesday, November 15, 2017

Panaghiusa batok sa ilegal nga droga ug terorismo, 
panawagan ni Duterte sa pagbukas sa ASEAN Summit

MANILA, Nov. 14 (PIA)--Sa pormal nga pagbukas sa ika-31 nga Association of Southeast Asian Nation (ASEAN) Summit sa Cultural Center of the Philippines (CCP) kagahapon, nitutok sa panaghiusa batok sa ilegal nga droga ug terorismo ang mensahe ni Presidente Rodrigo Roa Duterte.

Sa iyang mensahe, gitumbok usab sa Presidente ang kamahinungdanon sa pagpatunhay sa kalinaw ug kalig-on sa rehiyon.

Parte usab sa pahayag ni Presidente Duterte ang pagpangayo og pasaylo kun gikinahanglang motutok sa ilegal nga droga ug terorismo ang iyang pahayag.

Giingong gusto lamang sa Presidente nga itumbok sa duha ka adlaw nga summit nga maayong oportunidad alang sa mga miyembrong nasod nga hisgotan ang mga mahinongdanong ‘regional matters’ ug uban pang hisgotanan sa tibuok kalibotan.

Matud pa ni Duterte nga nagpabiling hulga ang terorismo sa rehiyon.

“Terrorism and extremism endanger the stability of our region because the threats know no boundaries,” matud pa sa Presidente sa iyang pahayag. (ecb/PIA7-Bohol)

================
‘Malasakit Center,’ buksan 
sa 2 ka tambalanan sa Bohol

TAGBILARAN CITY, Nov. 14 (PIA)--Gitakdang buksan sa dili pa matapos ning buwan ang duha ka ‘Malasakit Center’ nga ibutang sa mga pampublikong tambalanan dinhi sa lalawigan sa Bohol.

Kini human gilagdaan niadtong Biyernes sa syudad sa Sugbo ang memorandum of agreement alang sa pagbutang og 'Malasakit Center' sa mga pampublikong ospital sa Bohol ug Cebu.

Gipangunahan ang paglagda sa maong MOA nila Presidential Assistant for the Visayas, Michael Lloyd Diño ug kauban ang mga regional director sa mga ahensiya sa gobyerno nga apil niining programa.

Ang ‘Malasakit Center’ sayong pinaskohan ni Presidente Rodrigo Roa Duterte ngadto sa mga kabos nga pasyente sa mga pampublikong tambalanan sa Visayas.

Usa kini ka one-stop shop nga nagtinguhang ipasayon ug ipadali sa pagproseso sa pagpangayo og tabang gikan sa mga ahensiya sa gobyerno alang sa mga kabos nga Pilipino.

Dinhi sa Bohol, ibutang ang duha ka “Malasakit Center’ sa Gov. Celestino Gallares Memorial Hospital ug Don Emilio Del Valle Memorial Hospital.

Samtang upat usab ang ibutang sa mga tambalanan sa lalawigan sa Cebu nga ipamutang sa Vicente Sotto Memorial Medical Center, Eversely Child's Sanitarium and General Hospital, Saint Anthony Mother and Child Hospital ug Talisay District Hospital. 

Pinaagi sa ‘Malasakit Center,’ daling maduolan sa mga pasyente ang mga ahensiyang mahimong makatabang sa ilang pagpatambal sama sa Department of Health (DOH), Department of Social Welfare and Development (DSWD), Philippine Health Insurance Corporation (Philhealth), Philippine Charity Sweepstakes Office (PCSO) ug uban pa. (ecb/PIA7-Bohol)

No comments: