Thursday, December 21, 2017

Dairy Box sa Bohol Dairy
magbukas sa ICM ugma

TAGBILARAN CITY, December 21 (PIA)--Magbukas na usab ang Bohol Dairy sa lain nga dairy box: usa ka tindahan sa lab-as nga gatas sa kabaw, ug kini adto na sa usa ka mall dinhi sa Tagbilaran.

Buksan sa Bohol Dairy ang Dairy Box didto sulod sa ground floor sa Island City mall, Disyembre 22 sa may alas 9:00 sa buntag.

Ang Dairy Box usa ka proyekto nga panginabuhi-an sa Bohol Dairy Cooperative aron ikapahiluna sa lokal nga mga kamerkadohan ang ilang nagkadaiyang produkto gikan sa gatas ug ubay nga mga produkto gikan sa mga kooperatiba sa tibuok lalawigan, pasabut ni Bohol Dairy Cooperative chairman Roger Damalerio.

Kini usab agi og pagsuporta sa paghatag dugang panginabuhi-an ug pangwarta sa mga mag-uuma ug dairy farmers aron makatagamtam og dyutayng alibyo sa kinabuhi, dugang ni Damalerio.

Ang pagpahimutang sa mga Dairy Box sa Bohol Dairy inabagan usab sa Cooperative Development Authority, Bohol Tourism Office, Department of Social Welfare and Development-Sustainable Livelihood Program, Provincial Government of Bohol, Department of Trade and Industry, Department of Education, Department of Science and Technology, ug sa Philippine Carabao Center.

Labing himalitan nga produkto sa Dairy Box mao ang chocobao; usa ka gatas sa kabaw nga gisagola'g tsokolate ug gipabugnaw'g maayo.

Lakip na usab sa ilang mga baligya ang kiseo, ice cream, cakes, torta, mga yema ug uban pang produkto gikan sa gatas.

Nakab-ot na sa Bohol ang tag 1000 ka litro nga gatas sa matag adlaw ug ang Dairy Box, usa sa mga paagi nga ang gatas mahidangat nga mas paspas ngadto sa mga konsumidor. (rahc/PIA-7/Bohol)



No comments: