Duterte, nagdeklarar og 10-day 

holiday ceasefire sa CPP-NPA

TAGBILARAN CITY, Dec. 20 (PIA)--Nagdeklarar og 10 ka adlaw nga unilateral ceasefire si Presidente Rodrigo Duterte sa Communist Party of the Philippines-New People’s Army (CPP-NPA) ning panahon sa Kapaskohan.

Matud pa ni Presidential Spokesperson Harry Roque, ang Suspension of Military Operations (SOMO) mahimong epek­tibo sugod sa Disyembre 24 hangtod Enero 2, 2018.

Gilauman sa Malakanyang nga tungod sa 10-day ceasefire, makuhaan ang kahadlok sa publiko kun hisgotan ang seguridad karong holiday season.

Naglaum ang Malakanyang nga atbangan usab kini og positibong tubag sa communist group ug magdeklarar usab kini og ceasefire karong Kapaskohan.

Matud pa ni Roque nga sa ingon niining okasyon, makita usab ang panaghiusa sa mga Pilipino isip usa ka nasyon nga ang tinguha mao ang kalinaw alang sa nasod.

Una niini, mipahayag si Presidente Duterte nga dili siya magdeklarar og holiday truce sa grupong komunista human niyang gi-kanselar ang peace talks sa CPP-NPA. (ecb/PIA7-Bohol)