Malakanyang, nagpagawas og listahan

sa mga matang sa pabuto nga gitugotan

TAGBILARAN CITY, Dec. 29 (PIA)--Pila ka adlaw sa dili pa ang pagsugat sa tuig 2018, nanawagan ang Malakanyang sa publiko nga likayan ang paggamit sa mga gibawal nga pabuto.

Base sa gipagawas nga pahayag sa Office of the Executive Secretary (OES), nakalatid sa Executive Order 28 nga community fireworks display ang ipatuman sa mga local government units (LGUs).

Gidili ang paghimo, pagbaligya ug paggamit sa mga pabuto ug pyrotechnics nga may sulod nga gunpowder o pulburang nga kapin sa duha ka gramo o 1.3 nga kutsarita.

Apil na niini ang piccolo, super lolo, whistle bomb, goodbye earth ug atomic big triangulo.

Samtang gitugotan ubos sa Republic Act (RA) No. 7183 ang pagbaligya ug paggamit sa bawang, kwitis, watusi, el diablo, small triangulo, paper caps, baby rocket, pulling of strings ug judah’s belt.

Gitugot usab ang paggamit og mga sparklers sama sa lusis, fountain, jumbo regular ug special, mabuhay, trompillo, airwolf, butterfly ug roman candle. 

Gitumbok sa OES nga gilagdaan ni Presidente Rodrigo Duterte ang EO 28 aron ma-regulate ug ma-kontrol ang mga pabuto ug pyrotechnic devices ug ang mga gitugotang pabuto ug pyrotechnic devices nga limitado lamang sa mga community fireworks display nga gitakda sa mga LGUs. 

Ang gitugotan lamang sa mga residential areas mao ang mga gitawag nga sparklers. (ecb/PIA7-Bohol)

===============

Malakanyang: PUJ modernization

program, dili anti-poor 

TAGBILARAN CITY, Dec. 29 (PIA)--Idayon na sa pagsulod sa bag-ong tuig ang pagpatuman sa jeepney modernization program sa gobyerno.

Kalabot niini, gitataw sa Malakanyang nga dili ‘anti-poor’ ang public utility vehicle (PUV) modernization program sa administrasyong Duterte, sukwahi sa pahayag sa pipila ka transport group.

Matud pa ni Presidential Spokesman Harry Roque, giseguro sa gobyerno sa mga jeepney driver nga dili sila mabalewala sa improvement sa public transport sector.

Giingong gihimo sa Department of Transportation (DOTr) ang tanang paagi aron tarungon ang pasilidad sa transportasyon pinaagi sa modernization program, bisan ang pagsiguro nga tubagon ug tabangan ang mga reklamo sa mga drayber sa PUV.

Apil sa mga lakang sa DOTr ang pagbaton og probisyon sa financing scheme alang sa pagpalit og mga bag-ong jeepney units pinaagi sa Development Bank of the Philippines (DBP) Support Alternative Driving Approaches Program ug Landbank of the Philippines (LBP) Special Environment – Friendly and Efficiently Driven Jeepney Program.

Gawas kini sa tanyag sa Department of Finance (DOF) nga 5% equity, 6% interest rate ug repayment period nga hangtod pito (7) ka tuig nga financing package gawas pa sa P80,000.00 subsidy matag unit. (ecb/PIA7-Bohol)