Mga bag-ong opisyal sa AUDIO-

Bohol, nanumpa sa katungdanan

TAGBILARAN CITY, December 20 (PIA)--Nanumpa sa pangatungdanan ang mga bag-ong napili nga opisyal sa Association of United Development Information Officers in Bohol (AUDIO-Bohol) niadtong Disyembre 7, 2017 didto sa MetroCentre Hotel ning syudad.

Ang AUDIO-Bohol usa ka hiniusang bahan sa mga information officers sa kalungsoran kun local government units (LGUs) ug mga ahensya sa kagamhanan kun national government agencies (NGAs) nga nagtambayayong sa pagpakatap sa mga kasayoran ngadto sa katawhan sa mga kalungsoran.

Napili pagbalik sa ikaduhang termino sa pagka-presidente si Nicolas Sendrijas sa lungsod sa Calape.

Apil usab nga nanumpa sila: Bruce Zabala (BJMP) isip Vice President for NGA; Jojeline Ruiz (LGU Trinidad), isip Vice President for LGU; Marichu Cua (TESDA) isip Secretary; Elvie Bongosia (PIA) isip Assistant Secretary.

Samtang napili si Mylene Bulasa (BOTr) isip Treasurer; Jessica Wise (LGU Tubigon) isip Assistant Treasurer; Charluth Garcia (LGU San Miguel) isip Auditor; Fiel Angeli Gabin (Tagbilaran City) isip Press Relations Officer sa 1st District; Larry Evangelista (LGU Ubay) isip PRO sa 2nd District; ug Charlie Bonifacio (LGU Anda) isip PRO sa 3rd District.

Ang AUDIO ubos sa pagdumala sa Philippine Information Agency (PIA) ug sa ilang advisory Group nga naglangkob nilang: Augustus Escobia, Ric Obedencio ug Fiel Angeli Gabin.

Ang mga bag-ong opisyal nanumpa atubangan ni Gob. Edgar Chatto diin sa iyang mensahe, gipatugbaw niini ang mahinungdaong papel nga gidala sa mga government information officers sa pagpadayag sa direksiyon sa kalamboan sa Bohol nga nagdasig sa komunidad sa pagsalmot diin nagdala niini sa kalamposan karon sa lalawigan.

“To keep people involved means to keep people informed and this relates to good communication which is the backbone of development,” matud pa sa gobernador.

Gipasalamatan usab ni Chatto ang mga miyembro sa AUDIO-Bohol taliwala sa pag-ani sa lalawigan og mga pagsidunggog dungan sa pag-awhag sa mga information officers sa pagpahibalo sa mga Bol-anon nga ang tanan parte sa kahimoan sa Bohol.

"How well our programs is understood by our people is a function of our people at the AUDIO and they have done quite well," matud pa sa gobernador.

Ang AUDIO-Bohol natukod ubos sa pagsalig nga ang pagpakatay sa kasayuran maoy usa sa mga gimbuhaton sa mga kagamhanan aron ma-aghat niini ang katawhan sa paglihok alang sa ilang katagbawan. (PIA-Bohol/ecb)

Ang mga bag-ong napiling opisyal sa AUDIO-Bohol nanumpa sa pangatungdanan atubangan ni Gob. Edgar Chatto niadtong Disyembre 7, 2017 didto sa MetroCentre Hotel, syudad sa Tagbilaran. (ecb/PIA7-Bohol)