Mga kawani sa gobyerno, makadawat og 

P5,000 ‘productivity bonus’ sa Dec. 15

TAGBILARAN CITY, Dec. 05 (PIA)--Makadawat og P5,000 Productivity Enhancement Incentive (PEI) ang mga empleyado sa gobyerno sa Disyembre 15.

Kini human sa gipagawas nga Budget Circular No. 2017-4 sa Department of Budget and Management (DBM).

Ubos sa maong circular, makadawat og incentive ang tanang opisyal ug empleyado sa local government units (LGUs), tanang unipormadong polis ug sundalo, tanang empleyado sa ehekutibo, lehislatibo, ug hudikatura, mga kawani sa mga state universities and colleges (SUCs), ug mga empleyado sa mga government owned and controlled corporations (GOCCs) nga dili sakop sa Republic Act 10149.

Matud pa sa DBM, mokabat sa P7.5 bilyon ang gigahing budget alang sa productivity enhancement incentive ang naa sa 1.5 milyong government workers.

Ang maong bonus alang sa mga empleyadong nihatag og ‘satisfactory service’ sulod sa di moubos sa upat ka buwan hangtod Nobyembre 30, 2017. (ecb/PIA7-Bohol)

================

DepEd mitataw: Walay estudyanteng 

nabakunahan og Dengvaxia sa Bohol 

TAGBILARAN CITY, Dec. 05 (PIA)--Gisiguro sa Department of Education (DepEd) nga walay estudyante sa lalawigan sa Bohol nga nabakunahan og Dengvaxia. 

Matud pa ni Provincial Schools Division Superintendent Wilfreda Bongalos, gisusi og maayo sa DepEd ang ilang records ug natinong walay estudyante sa Bohol ang nahatagan sa maong immunization program sa gobyerno.

Gidugang pa ni Bongalos nga ang DOH nakig-koordinar kaniadto sa DepEd-Bohol alang unta sa maong anti-dengue vaccination campaign apan wala pa niabot ang maong Dengvaxia nga mga bakuna sa lalawigan.

Samtang sa iyang bahin, si Provincial Health Officer Dr. Reymoses Cabagnot ni-kumpirmar usab nga walay niabot sa Bohol sa P3.5 bilyong kantidad sa mga vaccine vials nga gipalit sa gobyerno sayong buwan sa niaging tuig.

Una nang gi-angkon sa Sanofi Pasteur, ang manufacturer sa Dengvaxia nga mahimong magdala og “severe disease” kun ang mabakunahan niini wala pa nagka-dengue.

Sa kinatibuk-an, mokabat sa 733,000 ka estudyante gikan sa mga public elementary school sa Regions III, IV-A ug National Capital Region ang nabakunahan sa Dengvaxia. 

Giseguro sa Malakanyang nga manubag gayud ang mga responsable sa maanomalyang Dengvaxia vaccine. 

Matud pa ni Presidential Spokesman Harry Roque, mas gipalapdan na sa DOH ang pagbantay ug pagtuon sa dengue vaccination program sa gobyerno dungan sa panawagan sa publiko nga dili magpakatap og mga impormasyon nga mahimong magdala og kahadlok ug alarma. (ecb/PIA7-Bohol)