Mga tambalanan sa Bohol

naka-code white alert na

TAGBILARAN CITY, Dec. 19 (PIA)--Gibutang na karon sa white code alert ang tanang 10 ka provincial hospitals sa Bohol isip pagpangandam sa kasaulogan sa Pasko ug pagsugat sa tuig 2018.

Sa usa ka radio interview, gibutyag ni Provincial Health Office (PHO) chief Dr. Reymoses Cabagnot nga ubos sa code white alert, ang tanang hospital staff ilabi na kadtong nabutang sa mga emergency rooms, mga surgeons ug kadtong adunay specialization sa trauma ug injuries, gibutang sa ‘on standby’.

Samatang ang mga Rural Health Units (RHU) sa nagkalain-laing lungsod gimanduan nga magpabiling alerto diin ang mga pasilidades dinhi kinahanglang andam ug adunay kawani nga naka-standby.

Matud pa ni Cabagnot nga gimanduan ang mga kawani sa RHUs nga magpabiling ‘on call’ sa maong mga adlaw.

Gidugang usab niini nga ang preparasyon sa pasilidades sa panglawas krusyal matag Pasko ug Bag-ong tuig diin adunay mapaabot nga mga firecracker-related injuries ug bisan ang mga pasyente nga maigo sa saag nga bala diin nahinabo gayud sa mga niaging tuig.

Sa pagkakaron, wala pa’y natala sa lalawigan nga gidala sa mga tambalanan tungod sa firecracker accidents. (ecb/PIA7-Bohol)