‘No travel abroad,’ gimando ni Duterte 

sa mga kawani ug opisyal sa gobyerno

MANILA, Dec. 22 (PIA)--Gimando ni Presidente Rodrigo Duterte nga bawal na ang mga biyahe sa gawas sa nasod sa mga opisyal ug kawani sa gobyerno gawas na lamang sa mga diplomats.

Tungod kini sa sunud-sunod nga pagpalagpot sa Presidente sa pipila ka mga opisyal ug kawani sa gobyerno tungod sa ilang mga biyahe abroad o junket.

Gitumbok sa Presidente nga angay magdaginot ang gobyerno sa pondo niini mao nga dili angay magpabilin dinhi ang mga nag-alagad sa katawhan nga walay gihimo kun dili ang pag-usik-usik sa salapi sa katawhan.

Gitambagan usab sa Presidente ang mga kawani sa sangay sa ehekutibo sa paghawa na lamang sa gobyerno kun dili makasunod sa iyang kamanduan.

“I don’t want to interfere in Congress and Supreme Court. Sa inyo iyan. Dito sa akin, I’ll cut it, except the diplomats. Sabihin ko muna, walang travel, mag-starvation diet muna tayo ‘diyan,” matud pa ni Duterte.

Kahinumdoman nga gitangtang ni Presidente Duterte ning bag-o lang sa pwesto si Presidential Commission on the Urban Poor (PCUP) Chairman Terry Ridon ug mga Commissioner niini, apil na usab si Development Academy of the Philippines (DAP) President Atty. Elba Siscar Cruz ug kanhi Dangerous Drug Board (DDB) Chairman Dionisio Santiago tungod sa giingong mga junket o biyahe nila sa gawas sa nasod. (ecb/PIA7-Bohol)