Trabaho sa gobyerno, 

suspendido sa Dec. 26 ug Jan. 2

TAGBILARAN CITY, Dec. 18 (PIA)--Gisuspenso sa Malakanyang ang trabaho sa gobyerno sa umaabot Disyembre 26, 2017 ug Enero 2, 2018.

Base sa Memorandum Circular No. 37 nga gilagdaan ni Executive Secretary Salvador Medialdea, gisuspenso ni Presidente Rodrigo Duterte ang trabaho sa gobyerno aron makauban sa mga kawani sa gobyerno ang ilang pamilya sa mas taas nga panahon sa Pasko ug Bag-ong Tuig.

Sakop niining memorandum circular ang mga naa sa government-owned and controlled corporations, government financial institutions, local government units, ug state universities and colleges.

Apan nakalatid usab sa maong memorandum circular nga ang mga ahensya nga may kalabotan sa paghatag og basic ug health services, preparedness/response disasters and calamities ug uban pang vital services, kinahanglang ipadayon ang ilang operasyon ug paghatag og serbisyo.

Samtang gitugyan sa Palasyo ang pag-desisyon sa pagsuspenso sa trabaho sa ubang buhatan nga naa sa gawas sa Ehekutibo ug mga pribadong sektor, independent commission ug bodies.nga dili sakop sa work suspension. (ecb/PIA7-Bohol)

================

DOLE, nipahinumdom sa holiday pay rules

sa Disyembre 25, 30 ug Enero 1

TAGBILARAN CITY, Dec. 18 (PIA)--Nipahinumdom ang Department of Labor and Employment (DOLE) sa mga empleyado gikan sa pribadong sektor kalabot sa saktong sumbanan sa holiday pay sa umaabot nga Pasko, Rizal Day ug Bag-ong Tuig.

Kini base na usab sa gilagdaan ni Presidente Rodrigo Duterte nga Proclamation No. 50, series of 2016 niadtong Agosto 16, 2016 diin gi-deklarang regular holiday ang Disyembre 25 ug 30, 2017, ug Enero 1, 2018.

Nagpagawas ang DOLE sa Labor Advisory No. 13 nga naglatid sa saktong suholan sa mga nahisgotang petsa.

Sa abiso sa DOLE, makadawat pa gihapon ang mga empleyado nga dili mo-trabaho sa mga nahisgotang petsa og 100 porsyento sa ilang sweldo matag adlaw.

Kun mosulod sa trabaho ang empleyado, angay kini makakuha og 200 porsyento sa iyang sweldo alang sa unang walo ka oras sa trabaho sa usa ka adlaw.

Apan kung molapas sa walo ka oras, makadawat ang empleyado og dugang 30 porsyento sa iyang hourly rate.

Makadawat usab ang mga empleyado nga nagtrabaho ug natunong sa adlaw sa iyang day-off og dugang 30 porsyento sa inadlaw niya nga sweldo nga 200 porsyento.

Ug kun mag-overtime pa, makadawat pa kini og dugang 30 porsyento sa iyang hourly rate. (ecb/PIA7-Bohol)