128 mag-uuma sa Bohol,

nakadawat na og CLOA

TAGBILARAN CITY, Enero 19 (PIA)--Natapos na gyud ang taas nga panahon nga paghulat sa 128 ka mag-uuma sa Bohol human nadawat na nila ang ilang certificates of land ownership award (CLOAs) atol sa gipahigayong turn-over ceremony sa Dao Diamond Hotel ning syudad kagahapon.

Gipangunahan ang maong CLOA distribution ni Department of Agrarian Reform (DAR) Undersecretary Karlo Bello sa DAR Field Operations Office nga nag-representar ni Kalihim John Castriciones inubanan nilang Director Leomides Villareal sa Public Assistance and Media Relations Service (PAMRS), Director Alejandro Otacan sa DAR Region 7 ug PARPO II Grace Fua sa DAR-Bohol.

Nitambong usab sa maong seremonya sila DAR 7 Asst. Reg. Dir. Eliasem Castillo ug PARAD DAR Bohol chief Nellie Canillas.

Si Bohol Gob. Edgar Chatto nga nitambong usab sa CLOA distribution nanawagan ngadto sa mga ARBs sa pag-ugmad og maayo sa ilang yutang gipanag-iya na karon.

Gi-ila usab ni Chatto ang kontibusyon sa DAR sa kinatibuk-ang paningkamot sa lalawigan sa Bohol sa pagpa-ubos sa poverty incidence sa lugar.

Ang mga CLOA nga gipangapud-apod naglangkob sa 103.5351 ka ektarya sa nagkalain-laing munisipalidad sa probinsiya sa Bohol.

Ang maong mga lungsod naglakip sa Carmen (8.2725 ektarya); Catigbian (17.4924); Getafe (5.4217 ug 19.5585); Danao (12.3711); Pilar (13.6240 ug 2.1319); San Miguel (0.4473 ug 8.2445); Sierra Bullones (5.6982) ug Guindulman (10.2730).

Gidayeg ni Bello ang mga paningkamot sa mga opisyal ug kawani sa DAR tungod sa paspas nga pag-proseso ug pagpangapud-apod sa CLOAs ngadto sa 128 ARBs.

Gawas sa land distribution, ang DAR naglusad usab sa nagkalain-laing proyekto nga naglambigit sa irigasyon, farm-to-market roads ug development initiatives sama sa Agrarian Reform community Development Program, Agrarian Reform Infrastructure Support Project ug Belgian Integrated Agrarian Reform Support Project, ug uban pa. (ecb/PIA7-Bohol)

Ang 128 ka mga agrarian reform beneficiaries sa lalawigan sa Bohol nga nakadawat na sa ilang certificates of land ownership award atol sa gipahigayong distribution ceremony niadtong Enero 18 sa Dao Diamond Hotel, ning syudad sa Tagbilaran. (DAR Bohol photo)