Wednesday, January 17, 2018

3-M senior citizens, mahatagan og dugang
subsidiya tungod sa TRAIN Law

TAGBILARAN CITY, Enero 17 (PIA)--Gibanabanang naa sa 3-milyong senior citizens sa tibuok nasod ang makadawat og dugang nga P200 subsidiya matag buwan ubos sa “Unconditional Cash Transfer” alang sa mga kabos, base sa nakalatid sa bag-ong Tax Reform for Acceleration and Inclusion (TRAIN) Law.

Matud pa ni Department of Social Welfare and Development (DSWD) Officer-In-Charge Emmanuel Leyco, ang mga senior citizen nga nalakip sa Social Pension Program sa gobyerno makadawat og dugang nga P300 matag buwan sa 2019.

Giingong makadawat usab sila og lump sum nga P2,400 sa umaabot nga buwan sa Marso.

Gawas pa kini sa binuwang pension nga P500.

Apan gi-klaro ni Leyco nga dili tanang senior citizen ang kwalipikado tungod kay kadto lamang mga nalakip sa Social Pension Program sa ilang ahensiya ang mahatagan sa bag-ong subsidiya.

Ang dugang tabang pinansyal nakalatid sa TRAIN Law aron maabagan ang mga kabos nga senior citizen sa epekto sa pagsaka sa presyo sa mga panaliton tungod sa bag-ong buhis nga ipahamtang sa pipila ka produkto. (ecb/PIA7-Bohol)

=================
COC filing sa Brgy-SK elections,
gitakda sa Abril

MANILA, Enero 17 (PIA)--Gitakda sa Commission on Elections (COMELEC) sa buwan sa Abril ang pagduso sa certificate of candidacy (COC) sa mga gustong modagan sa umaabot nga Barangay ug Sangguniang Kabataan elections.

Matud pa ni COMELEC Spokesman James Jimenez, tugotan lamang nga moduso sa COC ang mga kandidato gikan Abril 14 taman Abril 29.

Samtang gitakda usab ang campaign period gikan Mayo 4 hangtod Mayo 12.

Gitataw ni Jimenez nga gamiton pa gihapon ang una nang naimprentang mga balota nga angay unta gamiton niadtong Oktubre sa wala pa gi-oktaba ang eleksiyon.

Gibutyag sa tigpamaba sa COMELEC nga ang maong mga balota gamiton sa National Capital Region (NCR), Luzon ug Visayas, samtang mag-imprenta og bag-ong mga balota alang sa Mindanao. (ecb/PIA7-Bohol)

================
Geñorga, bag-ong police 
provincial director sa Bohol

TAGBILARAN CITY, Enero 17 (PIA)--Pormal nang ni-asumir si Police Senior Superintendent Angeles Geñorga kagahapon isip bag-ong provincial police director sa Bohol.

Si Geñora ang nihulip kang Senior Supt. Felipe Natividad human kini gi-reassigned ngadto sa Camp Crame isip assistant chief sa Firearms and Explosives.

Ang seremonya sa change of command gipahigayon kagahapon sa hapon didto sa Kampo Dagohoy ning syudad sa pagpanguna ni Police Regional Office 7 director Chief Supt. Jose Mario Espino.

Nitambong usab si Gob. Edgar Chatto sa maong formal turnover ceremony.

Sa wala pa nabalhin dinhi sa Bohol, si Geñorga unang na-assign sa Criminal Investigation and Detection Group (CIDG).

Atol sa turnover, si Natividad nagpasalamat sa mga Bol-anon ilabi na sa ‘civil government’ alang sa ilang pagsalig ug suporta nga gihatag ngadto sa lokal nga PNP command.

Samtang sa iyang bahin, ang bag-ong Bohol PNP chief mipasalig nga iyang e-implementar ang proyektong ABCD ni Gen. Espino nga mao ang “Always Busy Catching Criminals, Drug pushers and users”.

Gidugang usab ni Geñorga nga iya usab sagopon ang EFGH o “Effectively Fighting Goons and Hoodlums”.

Nanawagan usab siya og suporta gikan sa 47 ka station commanders sa lalawigan isip bag-ong lingkod nga provincial director sa Bohol. (ecb/PIA7-Bohol)

No comments: