Menor de edad nangawat,
kay gisugo sa gang leader
TAGBILARAN CITY, January
23, (PIA)--Pagkadakop sa duha ka menor de edad sa kaso nga pagpangawat sa usa
ka tindahan, nagtukas sa presensya sa lain na usab nga gang nga naa sa sulod sa
usa ka dako nga tunghaan sa sekondarya dinhi sa Tagbilaran.
Ang pagpatawag sa
City Social Welfare Officer kang Cabawan Barangay Captain Luis Bancure Coto
aron ilhon ang usa sa mga suspetsado nga nasakpan sa kawat, nagbutyag usab
modus operandi sa nasampit nga pundok sa kabatan-onan nga namiktima na sa mga
estudyante dinhi.
Ang mga menor de
edad nga nangawat, mi-angkon sa imbestigasyon nga nagtuman lamang sa sugo sa
usa ka daku-dako sa gang aron dili na sila hilabtan samtang nagtungha.
Hinuon, giangkon sa
mga tinugyanan sa Department of Education (DEPED) didto sa tigum nga dugay ra
nilang nalibkas ug solbad na ang mga gang sa mga tunghaan.
Apan si Kapitan Coto
positibo nga ang suspetsado nga iyang gika-estorya, kinsa taga San Isidro apan
miangkon lamang nga taga Cabawan, nakaila sila sa mga nagsugo kanila nga
mangawat.
Niini, gimandu
gilayon ni Bise Mayor Jose Antonio Veloso ngadto sa mga tinugyanan sa DepED alang
sa dali nga imbestigasyon ug ang pagpatawag sa giingong lider sa gang nga naa
sa sulod sa dakong tunghaan.
Matud ni Kapitan
Coto nga nahadlok siya nga kon magpermi kini ug dili masolbad, ma-apektahan
unya ang pagtambong sa mga bata sa tunghaan tungod sa kahadlok.
Gawas pa, ang
presenysa sa gang sa sulod sa mga tunghaan, mao ang kasagaran nga gamot sa mga
kagubot nga magbutang sa tunghaan sa lisud nga kahimtang.
Dugang pa, mipasalig
isab ang kapolisan sa Tagbilaran nga maghimo og follow up sa maong kaso samtang
maghimo na usab sa imbestigasyon, sagun pa ni PSupt Patricio Degay. (rahc/PIA-7/Bohol)
Gibutyag
ni Kapitan Luis Coto ang presenysa sa usa ka gang nga naa sa sulod sa usa ka
tunghaan sa Tagbilaran nga kansang lider nagsugo sa mga estudyante pagpangawat,
aron dili hilabtan sa grupo. Kini gipaimbestigahan na sa City Police ug sa
DepED. (rahc/PIA-7/Bohol)
No comments:
Post a Comment