Duterte, subling nipahinumdom nga bawal 

ang mga kawani sa gobyerno sa casino

MANILA, Enero 19 (PIA)--Subling nagpahinumdom si Presidente Rodrigo Duterte sa mga kawani sa gobyerno nga bawal silang mosulod sa mga casino.

Gitumbok sa Presidente ang Presidential Decree (P.D.) 1067-B nga na-amyendahan sa P.D. 1869 nga nagbawal sa mga opisyal sa gobyerno, mga sundalo ug 21 anyos paubos nga magduwa sa mga casino.

“May P.D. niyan eh. There’s a law. At that time, it was a law. It’s still the law. It was never modified or repealed,” matud pa ni Duterte.

Gitumbok pa niini nga ang maong Presidential Decree balaod man ug nagpabiling balaod ug wala bisan kanus-a gibag-o.

Tungod niini, gimanduan sa Presidente si Philippine National Police (PNP) Chief Ronald Bato Dela Rosa nga pugngan ang pagsulod sa mga kawani sa gobyerno sa mga casino ug ipatuman ang balaod.

Gimanduan niini ang PNP Chief sa pagbutang og pahibalo sa mga casino og “prohibiting all workers of government from entering.”

Kahinumdoman nga niadtong Setyembre 2016, gipagawas sa Palasyo ang Memorandum Circular 6 nga nagmando sa tanang opisyal ug kawani sa gobyerno apil ang mga polis ug militar nga sundon ang balaod nga nagbawal sa pagsulod, pagbisita ug pagduwa sa mga casino.

Subling nagpahinumdom ang Presidente kalabot niini human sa mga taho nga nadawat sa Malakanyang nga adunay mga opisyal sa gobyerno ang nagduwa sa casino bisan bawal kini. (ecb/PIA7-Bohol)

================

Overseas Filipino 

Bank, gilusad na

MANILA, Enero 19 (PIA)--Gilusad na ang Overseas Filipino Bank (OFBank) nga usa sa mga gisaad ni Presidente Rodrigo Duterte sa mga overseas Filipino workers (OFWs).

Mismong si Presidente Duterte usab ang nanguna sa paglusad sa OFBank diin gibutyag niini nga tumong sa pagmugna sa maong bangko nga ibalik sa OFWs ang mga natabang nila pinaagi sa bangko nga magserbisyo alang sa ilang banking ug financing requirements.

Pinaagi sa OFBank, mapalapdan ug mapakusog niini ang presensya sa gobyerno sa remittance market ug sa umaabot, maimpluwensyahan ang mas baratong bank remittance.

Gawas sa OFWs, alagaran usab sa maong bangko ang mga Filipino immigrants ug ang mga Pilipinong adunay resident visa.

Pipila sa mga serbisyong itanyag sa maong bangko ang deposits, loans ug investments, remittance ug payment service

Target sa OFBank nga magbukas og opisina sa Abu Dhabi, Dubai ug Bahrain sa ikaduhang kwarter ning tuig. (ecb/PIA7-Bohol)