FISHYALAN’ sa Calape,

gitakdang buksan sa Pebrero

CALAPE, BOHOL, Enero 12 (PIA)--Gitakdang buksan sa lokal nga kagamhanan sa lungsod sa Calape ug sa Bureau of Fisheries and Aquatic Resources (BFAR) ang ‘Fishyalan’ karong sunod buwan. 

Nahimutang sa Central Visayas Multi-Species Nursery Demonstration and Training Center sa BFAR sa Barangay Bentig ning lungsod, ang ‘Fishyalan’ usa ka talagsaong suroyanan diin makakat-on usab ang mga mobisita dinhi sa mga bag-ong teknolohiya sa pangisda.

Niining pamaagi, ang BFAR mas maka-pakatap sa ilang adbokasiya ug kasayoran kalabot sa nagkalain-lain nilang programa ug proyekto alang sa kaugmaran sa sektor sa pangisda sa rehiyon.

Ang mga miyembro sa Association of United Development Information Officers in Bohol (AUDIO-Bohol), sa ilang labing unang ‘out of town’ Bisita Opisina ug agency familiarization program ning tuig nga gi-host sa LGU-Calape, mipahigayon sa ilang unang meeting karong tuig sa maong lugar kagahapon.

Matud pa ni Nicolas “Nick” Sendrijas, AUDIO-Bohol President ug Information Officer sa maong lungsod, inig bukas sa publiko sa ‘Fishyalan,’ may entrance fee nga P20 matag tawo ug P15 alang sa mga batang may edad 12 anyos paubos.

Gidugang pa ni Sendrijas nga mahimong mamingwit ang mga mobisita diin may paabangan usab nga mga gamit sa pamingwit dala sa paon nga nagkantidad lamang og P5.00 og ang mga makuhang isda bayran ug mahimong ipaluto didto o mahimo ra usab dalhon paule.

Sa pagkakaron, ang People's Organization nga Bentig Farmers-Fishermen’s Association gitakdang mopaubos pa sa ‘entrepreneurship’ nga ipahigayon sa University of San Carlos (USC) Business Administration.

Kun maka-sugod na sa operasyon ug sa paghidangat sa katapusan sa tuig, ang net income o kita bahinon og 50-50 sa PO ug sa LGU Calape, matud pa ni Sendrijas.

Sa pagkakaron, adunay nagkantidad og P3 milyon nga milkfish ( bangus, ) siganid (kitong) , pompano (talakitok) , tilapia, mangrove crab ug grouper (pugapo) ang naka-stock sa duha ka fish ponds sa maong ‘Fishyalan.’

Ang Memorandum of Agreement alang sa operasyon sa ‘Fishyalan’ gilagdaan na nila Calape Mayor Nelson Yu ug BFAR Regional Director Allan Poquita. (ecb/PIA7-Bohol)

FISHYALAN. Gitakdang buksan karong buwan sa Pebrero ang Fishyalan sa lungsod sa Calape nga nahimutang sa Central Visayas Multi-Species Nursery Demonstration and Training Center sa BFAR sa Barangay Bentig. (ecb/PIA7-Bohol)