Hayop nga ikarga sa eroplano, 

barko, kinahanglag dokumento 

TAGBILARAN CITY, January 18, (PIA)--Alang sa mga naglaraw nga motabok og dagat nga magdala og mga hayopan, karne nga lab-as, mga tanum, segurohan daan nga may dala usab nga tukmang mga papeles aron dili mahasul. 

Sa pagpaningkamot sa kagamhanan nga kapanalipdan ang lokal nga industriya sa panghayupan, gipatuman ang pagkwarantina sa mga hayupan aron makaseguro nga walay madala niini nga sakip nga mahimong makatakud sa mga hayupan sa lugar nga padulngan. 

Kini usab aron kapugngan ang pagsulod sa sakit gnga madala sa mga dili dokumentado nga mga hayup. 

Kini maoy aghat sa Bureau of Animal Industry (BAI), usa ka sanga sa Department of Agriculture (DA) kansang gimbuhaton naglakip sa regulatory function sa pagpagawas sa mga permits sa pagpakarga sa mga hayupan tabok sa mga kadagatan. 

Labing menos gahinan ug usa ka adalw sa dili pa mobyahe aron makakuha og Veterinary Health Certificate (VHC) alang sa hayup nga ibyahe gikan sa usa ka beterinaryo ug kini ipakita sa BIA nga naa sa mga pantalan ug airports aron mahatagan sa permit to transport o shippers permit. 

Ang pagpatabok sa mga hayupan ilabi na sa iro og iring nagkinahanglan sa labing menos tulo ka mga papeles: 1. sertipiko sa pagbakuna nga labing menos nahimo sa kalapusang 15 ka adlaw sa wala pa ang byahe, 2. Veterinary Health Certificate (VHC) ug ang permit alang sa local shipment of animals (shipper's permit). 

Gipasabut ni Dr. Maria Eleonor Abisado, sa BAI Bohol nga ang pagkuha sa mga tukmang permits ug sertipiko aron mabyahe ug makarga ang hayop dili aron lisud lisoron ang katawhan. 

Hinuon, pinaagi niini, mapaneguro nga ang hayup nga gitabok sa lawod, walay bitbit nga sakit nga mahimong makatakod, sama sa rabies.

Sa kaso sa mga manok, ug itlog, gikinahanglan ang VHC nga makuha gikan sa mga beterinaryo nga publiko o pribado ug ang shippers permit nga makuha gikan sa mga Buhatan sa BAI nga naa sa mga pantalan og sa airport. 

Ang (VHC) makuha human ma-check-up sa usa ka beterinaryo ang hayop nga itabok, ug kini maoy gikinahanglan aron ang nagdala sa hayupan nga itabok, makakuha sa shippers permit. 

Sa kaso sa mga kabaw, baka og kanding, gikinahanglan nga may dala usab nga Certificate of Ownership dugang sa VHC ug shippers permit aron matugotan nga makatabok. 

Gani, gidason usab sa Philippine Coast Guard nga agi og pagtabang sa BAI aron mapatuman ang mandatu niini sa pagpanalipod sa lokal nga panghayopan, motabang sila sa pagpugong sa mga sakyanan sa dagat nga magkarga sa mga walay dokumento nga hayupan nga itabok. 

Si Chief Master at Arms Elmer Esteves sa PCG Bohol kinsa maoy namahayag sa ngalan ni Captain Edgar Boado, mibutyag nga multa nga P 2 mil ang ipataw sa kapitan ug P5 mil sa tag-iya sa barko o eroplano nga mokarga sa mga hayupan nga walay dokumento. 

Pinaagi sa BAI Memorandum Circular No. 26, Series of 2017, giluwatan sa BAI ang giya sa pagkuha sa shippers permit sa pagkarga sa buhi nga hayupan, mga produkto gikan niini ug mga by-products sama sa mga delata og processed nga pagkaon. (rahc/PIA-7/Bohol)

Ayaw salig nga makalabang ang karga nga buhing hayupan kon wala kay dala nga sertipiko sa pagbakuna, sertipiko sa kahimsug sa hayup gikan sa beterinaryo ug sa tukmang permit sa pagkarga sa hayop gikan sa BAI, pahinumdom ni Dr. Maria Eleonor Abisado didto sa kapihan sa PIA. (rahc/PIA-7/Bohol)