Wednesday, January 10, 2018

Joint Reso alang sa base pay increase sa militar
ug uniformed personnel, aprubado na ni Duterte

MANILA, Enero 10 (PIA)--Gi-aprubahan na ni Presidente Rodrigo Duterte ang Joint Resolution Number 1 sa 17th Congress nga nagtakda og umento sa “base pay” sa militar ug uniformed personnel.

Sakop sa base pay increase ang mga miyembro sa Armed Forces of the Philippines (AFP), mga uniformed personnel ubos sa Department of Interior and Local Government (DILG) sama sa Philippine National Police (PNP), Bureau of Fire Protection (BFP) ug Bureau of Jail Management and Penology (BJMP), apil usab ang miyembro sa Philippine Coast Guard (PCG) ug National Mapping and Resource Information Authority (NAMRIA).

Epektibo sugod Enero 1 ning tuig 2018 ang pagpatuman sa umento sa suholan sa mga nahisgotang uniformed personnel.

Ang mga adunay ranggong private sa AFP, Jail ug Fire Officer 1, Police Officer 1, Apprentice Seaman o Seaman Third Class sa PCG ug NAMRIA makadawat na og binuwang suholan nga P29,668. (ecb/PIA7-Bohol)

==============
Salary increase sa mga magtutudlo, 
gipatutokan na usab ni Duterte sa DBM

MANILA, Enero 10 (PIA)--Gi-anunsiyo kagahapon sa Malakanyang ang maayong balita alang sa mga magtutudlo sa pampublikong tunghaan sa tibuok nasod.

Matud pa ni Presidential Spokesman Harry Roque, sunod nga magbaton og pagsaka sa ilang sweldo ang mga magtutudlo human sa mga sundalo ug pulis.

Gipahayag ni Roque nga nahisulod sa ikaduhang tax reform package sa gobyerno nga planong ipalabang sa administrasyon sa unang parte sa 2018.

Gibutyag ni Roque nga sa bag-o lang gipahigayong Cabinet meeting, gitahasan ni Presidente Rodrigo Duterte ang Department of Budget and Management (DBM) ug uban pang ahensiya sa gobyerno nga pangitaan og paagi aron mapatuman ang maong salary increase sa mga magtutudlo.

“Now, in connection with the second tax reform package, the President also stated that with the second tax reform package, he has instructed DBM and all other agencies to find means to increase the salary of teachers after the initial doubling of salaries for the AFP and the police. So the teachers will be next,” matud pa ni Roque.

Una nang miingon ang Presidente nga mahimong prayoridad sa iyang administrayon ang pagsaka sa sweldo alang sa tanang mga kawani sa gobyerno. (ecb/PIA7-Bohol)

===============
PAGASA, nipasidaan batok sa baha ug 
pagdahili sa yuta tungod sa ‘weak La Niña’

TAGBILARAN CITY, Enero 10 (PIA)--Ang buhatan sa Philippine Atmospheric, Geophysical and Astronomical Services Administration (PAGASA) Bohol nipasidaan sa publiko batok sa posibleng pagbaha ug pagdahili sa mga yuta tungod sa mga ulan nga dala sa “weak La Niña” sa nasod.

Matud pa ni PAGASA Bohol officer-in-charge Leonard Samar, padayong nakasinati og mga pag-ulan ang pipila ka parte sa lalawigan sa Bohol ug ubang probinsiya sa Kabisay-an ning mga milabay nga adlaw human sa pagka-umol sa hinay nga La Niña nga gibanabanang molanat taman sa buwan sa Marso.

Gibutyag ni Samar nga base sa PAGASA forecast, gipaabot ang “above normal rainfall” sa umaabot nga mga semana o posibleng sa kinatibuk-ang unang kwarter ning tuig.

Apan gitataw usab sa tinugyanan sa PAGASA nga sa pagkakaron, walay “weather systems” nga naka-apekto sa lalawigan ug sa ubang parte sa Kabisay-an bisan sa nagpadayong pag-ulan.

Una nang gitag-an sa PAGASA nga magsugod nga maka-apektar ang La Niña sa nasod niadtong Disyembre sa niaging tuig.

Apan ang kinabag-an sa ulan sa Bohol sa mga niaging buwan dala man sa tulo ka ‘weather disturbances’ o bagyo nga mi-igo sa nasod ilabi na sa katapusang parte niadtong Disyembre ug mga unang adlaw sa tuig 2018. 

Ang La Niña ang binali sa El Niño diin ang temperatura sa ibabaw sa dagat sa gilay-ong pang-ekwador sa sidlakang tungang kadagatang Pasipiko mahimong mas moubos sa 3-5 nga gradong Celsius kun itandi sa normal. (ecb/PIA7-Bohol)

No comments: