Wednesday, January 31, 2018

LTO makapatik 80 ka plastic
Nga lisensya matag adlaw

TAGBILARAN CITY, January 30 (PIA)—Otsenta lamang ka lisensya nga plastic ang labing daghan nga kayahon sa Land Transportation Authority (LTO) nga iprinta sa usa ka adlaw. 

Kini maoy gipaabut ni LTO information office Florencio Balazuela ngadto sa mga sakop sa Provincial Peace and Order Council (PPOC) sa tigum niadtong Lunes, Enero 29. 

Kini usab human gihatagan sa komendasyon ni Gob Edgar Chatto, tsirman sa PPOC ang LTO tungod sa pagsunod na niini sa pagpagawas sa mga lisensya nga valid sa lima ka tuig ug didto na imprintaha sa district office. 

Kahinumduman nga gipangunahan mismo ni Assistant Secretary Edgar Galvante sa LTO uban ni Regional Director Victor Emmanuel Caindec ug mga local nga opisyales ang pag roll-out sa mga lisensya nga maayo alang sa lima ka tuig.

Niadtong adlawa, giimprinta ug gitugyan ni Asec Galvante ang mga lisensya nila ni Mayor John Geesnell Yap, Mayor Lynn Iven Lim, Mayor Purez Chatto, Acting Provincial Administrator Mitchell John Boiser, ug mga sakop sa media.

Human niadto, nahingawa ang mga sakop sa PPOC kon mohasmag ang mga katawhan sa LTO nga magtuo nga mahimo na nga i-hatag ang naimprinta nga plastic nga lisensya.

Gipasabut ni Balazuela nga sa kasamtangan nga backlog sa LTO sa mga lisensya nga mikabat na ngadto sa 25,000 ug kini hinayhinayan usab nila og imprinta, samtang may dawaton usab sila nga mga kliyente sa inadlaw-adlaw nga pagproseso. 

Niini, matud ni LTO IO Balazuela, 50 lamang ka backlog nga lisensya ug 30 ka renewals ang kaya nga maiprinta sa matag adlaw nga dili usab bug-atan pa ang makina. 

Tungod niini, kadtong mga adunay iprintahonon na nga lisensya kay nahuman na sa renewal ug wala pa mahatagi sa plastic nga lisensya, mofill-up sa mga naka-abli nga slots alang sa usa ka adlaw, aron matawag ug kaalagaran na sa makina. 

Tungod pa usab niini, mihangyo ang LTO sa dyutay pa nga pasensya samtang himoon sa buhatan ang pagtibawas sa mga wala pa niini madeliver nga mga lisensya ug mga plaka.

Gipasalig hinuon sa LTO nga sa hinayhinay, dala na usab sa bag-ong kasaligan nga koneksyon sa internet, milaum sila nga kakunhoran na matag adlaw ang backlog niini ilabi na ngadto sa mga lisensya sa pagmaneho. (rahc/PIA-7/Bohol)

Gihatagan ni LTO IO Balazuela sa instruksyon si City Mayor John Geesnell Yap kon unsaon pag fill-up sa forma nga maoy basehan pag encode sa mga datus nga Makita unya sa printado nga lisensya niadtong paglusad sa LTO sa mga lisensya nga pwede na sa lima ka tuig. (rahc/PIA-7/Bohol) 

No comments: