LTO Text service,

gilusad og balik

TAGBILARAN CITY, Enero 18 (PIA)--Gilusad og balik sa Land Transportation Office (LTO) kagahapon didto sa kaulohan ang ilang LTO TEXT campaign.

Ang LTO TEXT usa ka serbisyo sa LTO diin pinaagi lamang sa pag-text, makumpirmar ang mga record sa sakyanan o di kaha ang record sa driver’s license.

Aron magamit ang maong serbisyo, i-text lamang ang LTO VEHICLE aron mahibaw-an ang detalye sa sakyanan.

Samtang i-text lamang ang LTO LICENSE aron mahibaw-an ang detalye sa usa ka lisensya, ug i-send lamang kini sa 2600.

Sulod lamang sa pipila ka segundo, madawat na sa user ang reply sa LTO alang sa verification sa mga detalye kalabot sa naka-rehistrong sakyanan o driver’s license record. (ecb/PIA7-Bohol)

=================

Length-of-stay requirement sa mga kaso sa pneumonia 

ug uban pang sakit, gitangtang na sa PhilHealth

TAGBILARAN CITY, Enero 18 (PIA)--Gitangtang na sa Philippine Health Insurance Corporation (PhilHealth) ang length-of-stay (LOS) requirement alang sa mga kaso sa pagka-ospital tungod sa community-acquired pneumonia (CAP), acute gastro-enteritis (AGE) ug urinary tract infection (UTI).

Kini human natino sa PhilHealth nga adunay mga miyembro silang gituyong magpadugay pa sa ilang pagpa-admit sa ospital aron makuha lamang ang reimbursement sa ilang benepisyo.

Base sa resolusyong gipagawas sa PhilHealth Board, nalakip usab niining bag-ong patakaran ang mga dependents sa ilang mga miyembro alang sa tanang accredited health care institutions sa tibuok nasod.

Tungod niining kabag-ohan, “subject to pre-payment medical review” na lamang ang mga kaso sa CAP, AGE ug UTI, ug pangayuon ang mga documentary requirements alang sa maong mga kaso sa dili pa ang pagbayad sa mga claims.

Kini nagpasabot nga kinahanglanon na ang certified true copy sa complete clinical chart sa pasyente alang sa pagkuha sa claims sa mga nahisgotang sakit apil na ang sepsis.

Nakalatid nga angay nalakip niini ang history sa sakit sa pasyente, course niini sa ward, vital signs monitoring, orders sheet sa doktor, mga notes sa mga nurse, lakip na ang laboratory ug imaging results.

Matud pa sa PhilHealth nga ibalik lamang sa mga health care institutions ang mga claims kun dili kumpleto ang mga nahisgotang requirements alang sa compliance.

Ubos sa All Case Rates provider payment mechanism, magbayad ang PhilHealth og P15,000 alang sa moderate risk pneumonia, P32,000 alang sa high risk, P6,000 sa AGE ug ang coverage usab alang sa UTI magsugod sa P6,800 alang sa impeksyon sa ubang parte sa urinary tract samtang nagbuntis, P7,500 alang sa UTI sa unspecified site, P10,600 alang sa UTI following delivery ug P12,700 alang usab sa neonatal UTI. (ecb/PIA7-Bohol)