Wednesday, January 24, 2018

Lumba sa MTB XC
sa Getafe, Biyernes


TAGBILARAN CITY, January 23, (PIA)--Parehistro na alang sa lain na usab nga kulbahinam nga lumba sa cross country mountain bike (MTB XC) didto sa mga kabukiran sa Getafe, agi og pagpa-ukyab sa ilang gisaulog nga kapistahan.

Kini samtang ang 2nd Mayor Shaun Camacho MTB XC Race gikapahaum na sa Biyernes, Enero 26 kanus-a ang mga hilig sa MTB ug ang ampay mao ang pagbisekleta katkat sa mga bungtod og pada-us-os sa mga higad samtang manggilumba mahitabo.

Sa Getafe, ang lumba magsugod sa Poblacion unya mosubay sa highway pasaka sa Danao.

Human sa upat ka kilometro nga tungas, motipas ang race course paingon sa offroad section sa Baranay Santo Nino, diin masuwayan ang katakus sa mga moapil sa lumba sa paglaras sa teknikal nga mga ambugon.

Kon makalabang nga way kakuli-an, laing 2 ka kilometro na usab nga tungason ang sagubangon paingon sa Campao ug dinhi mas maka-bentaha ang mas lig-on og tuhod og kusgan sa lahutay.

Kon makasapong na og di malaspag, dili pa tantong luwas hangtud makalapas sa Buyog kay laing sunod sunod nga saka kanaug ang ruta hangud na sa panapos nga sprint pabalik sa Poblcaion, segun pa ni PO2 Adam Maglangit, usa sa mga organizers.

Mokabat sa 16.5 kilometros ang kinahanglang sagubangon aron isipon nga finisher ang magsasalmot sa lumba.

Ang lumba may upat ka kategorya: Juniors-Seniors sa 29 anyos ang edad paubos, Beterano sa 30-44 anyos ang edad, Masters o Golden sa 45 ang edad pataas ug ang All Women nga bukas alang sa tanang edad.

Ang lumba magsugod sa alas 10 sa buntag samtang gikinahanglang ang tanang mga bikers naka check-in sa sa mga biskleta sa alas 8:00 sa buntag.

Ang registration naa sa tag P120, segun sa organizers nga giapilan usab sa Local Government Unit sa Getafe.

Ang mga premyo sa podium winners mao ang P3,000, 2,000 ug P1,000 dala na ang medalya sa unang tulo ka manananug ug tag P500 ang matag usa sa ika upat ug ika lima nga pwesto.

Sa All women, ang podium finishers: P1,500, 1,000 and P500 dalang medalya samtang ang fourth ug fifth placers makakuhag tag P200 matag usa.

Alang sa dugang detalye, kontaka si PO Adam Maglangit pinaagi sa Getafe Police Station. (rahc/PIA-7/Bohol)
Sa bukid daugon ang lumba sa Getafe, diin giingon nga may mga sakit sa batiis nga tungason ug delikadong dulhogon, didto magdaug ang kahanas sa mga manuwaay sa lumba sa bisekleta karong Biyernes atul sa 2nd Mayor Shaun Camacho MTB XC race. (rahc/PIA-7/Bohol/hulagway gikan sa Asian Enduro sa Calape)

No comments: